Java në tregje – BQE vendos të enjten, FED merr lajmin të premten

Gjatë javës së ardhshme, dy ndër tre bankat qendrore kryesore të planetit do të vendosin ose do të jenë gati për të vendosur për ecurinë e politikave monetare. Banka Qendrore Europiane ditën e Enjte pritet të mos ndërhyjë, pavarësisht se presioni për të braktisur politikat monetare ultra lehtësuese është më i lartë se kurrë më parë gjatë viteve të fundit.

Gjatë javës, të dhënat tregonin se, inflacioni në Eurozonë ka tejkaluar objektivin e institucionit. Pavarësisht kësaj, programi i lehtësimit sasior në shkallë të gjerë, ka pak gjasa të ndërpritet.

Gjithsesi, fjala e Mario Draghit pritet me interes të madh nga tregjet. Në Shtetet e Bashkuara të Amerikës nga krahu tjetër, në ditën e fundit të javës për tregjet, pra të Premten, do të publikohen edhe të dhënat për punësimin, që janë edhe indikatori kyç për Rezervën Federale për të përcaktuar në rast se do të ketë ndërhyrje të menjëhershme apo jo.

Gjasat tregojnë se, ndërhyrje do të ketë. Të paktën këtë projektojnë investitorët dhe tregjet. Në mesjavë priten të dhëna të tjera me interes për tregjet, dhe që i referohen tregtisë së jashtme të Kinës. Po gjatë javës, mund të ketë një ndërhyrje në politikat monetare nga banka Qendrore e Australisë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.