Javë e rëndësishme për tregjet-Nga Washingtoni në Pekin, investitorët nën “ethe”
Kjo javë do të jetë me mjaft rëndësi për tregjet dhe investitorët. Aftësia e ekonomisë globale për t`u rimëkëmbur do të vihet sërish në provë gjatë javës, pas një serie të dhënash që pritet të publikohen, sidomos nga Washingtoni dhe Pekini.
Zyrtarët e Rezervës Federale do të përfundojnë ditën e Mërkurë mbledhjen e tyre të radhës dhe do të dalin me një qëndrim për ecurinë e politikave monetare. Pritshmëritë flasin për një mosndryshim të normave të interesit.
Gjithsesi, investitorët dhe tregjet presin me kujdes fjalën e kreut të saj, Jerome Powell, në ndjekje të çfarëdolloj fjale të tij sa i përket pritshmërive për të ardhmen. Ekspertët shprehen se mbledhja e datës 1 Maj të FED nuk do të sjellë ndryshime në politikat monetare, por se nga ana tjetër, do të ketë shumë gjëra të tjera prapa skene. Në SHBA ditën e Premte do të publikohen edhe shifrat e tregut të punës, si dhe një sërë të dhënash të tjera me rëndësi, gjatë javës.
Edhe këto të dhëna priten me interes mjaft të madh nga tregjet. Nga ana tjetër, Kina do të publikojë indeksin PMI të Martën, që shihet me mjaft interes nga tregjet pasi është një indikator me një saktësi të lartë sa i përket ecurisë së sektorëve të caktuar por edhe të ekonomisë në tërësi.
Edhe Franca me Italinë do të publikojnë të dhënat e prodhimit. Banka e Anglisë ndërkohë do të vendosë për politikat monetare ditën e Enjte.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.