Javë pozitive për bursat europiane – Analistët paralajmërojnë se Europa përballet me një recesion

Tregjet europiane po qëndojnë në rritje të lehtë në sesionin e fundit të javës dhe pritet të publikojnë fitime javore. Indeksi pan-Europian STOXX 600 e ka nisur ditën në rritje me rreth 0.2%, me sektorin e shërbimeve që realizon fitimet më të mëdha.

Tregjet në Europë u rritën ndjeshëm në sesionin e së enjtes, pas deklaratave të ministrit britanik të financave, Rishi Sunak, i cili njoftoi disa masa për të trajtuar rritjen e kostove të jetesës, duke përfshirë këtu taksimin e fitimeve nga kompanitë e naftës dhe gazit.

Të enjten përfundoi edhe Forumi Ekonomik Global i Davosit, ku ekonomistët paralajmëruan se Europa në mënyrë të veçantë, është shumë vulnerabël ndaj recesionit, si pasojë e luftës në Ukrainë.

Ndërkohë, kontratat “futures” në Wall Street po qëndrojnë në rënie të lehtë, ndërsa tregjet aziatike u rritën ndjeshëm. Investitorët janë veçanërisht të fokusuar te konflikti në Ukrainë, pasi një zyrtar amerikan deklaroi se Rusia po bën përparim në rajonin e Donbasit. Ndërkohë, ministria ruse e Mbrojtjes deklaroi se do t’i lejojë anijet e huaja të largohen nga portet në Detin e Zi, për shkak të rritjes së çmimeve të ushqimeve në rang global.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.