Jeni të fiksuar pas ushqimeve pikante? Tani keni një arsye më shumë

I kuq, pikant e madje edhe afrodiziak, speci djegës është një përbërës shumë i zakonshëm në kuzhinat e të gjithëve. Pa masë i lavdëruar për vetitë e tij të dobishme, tani për të dashuruarit me kuzhinën pikante ekziston edhe një arsye më shumë për të vazhduar këtë zakon të shëndetshëm: në fakt, speci djegës duket se është gjithashtu një aleat i shkëlqyeshëm i sistemit tonë kardiovaskular.

Sipas një studimi të ri italian i kryer nga Departamenti i Epidemiologjisë dhe Parandalimit të Irccs Neuromed Pozzilli, në bashkëpunim me Departamentin e Onkologjisë dhe Mjekësisë Molekulare të Institutit të Lartë të Shëndetit, Universitetit të Insubria në Varese dhe Qendrës Zemra mesdhetare në Napoli, sipas së cilës një konsum i zakonshëm i kësaj erëze shoqërohet me një ulje të rrezikut të vdekshmërisë së përgjithshme prej 23%, dhe në veçanti për sëmundje të zemrës, krahasuar me ata që nuk e konsumojnë atë. Studimi sapo u botua në Gazetën e Kolegjit Amerikan të Kardiologjisë.

Për ta kuptuar këtë, ekipi hulumtues rishikoi të dhënat nga 22.811 qytetarë të rajonit Molise, për të hetuar faktorët e mundshëm gjenetikë dhe mjedisorë që janë në themel të sëmundjeve kardiovaskulare, kancerit dhe patologjitë degjeneruese. Duke ndjekur gjendjen e tyre shëndetësore për një periudhë prej rreth 8 vitesh dhe duke e krahasuar atë me zakonet e ngrënies, studiuesit vunë në dukje se, tek njerëzit që konsumonin rregullisht speca djegës, të paktën 4 herë në javë, rreziku për të vdekur nga një infarkt apo iktus ishte zvogëluar me 40 %, ndërsa nga shkaqe cerebrovaskulare me rreth 60%.

Hapi tjetër, përfundojnë studiuesit, do të jetë kuptimi i mekanizmave biokimikë përmes të cilëve veprojnë si specat pikant ashtu dhe produkte të tjera të ngjashme me ta, pra të gjitha ato që karakterizohen nga prania e një lënde të quajtur capsaicin. Për momentin, të dashuruarit me pikantet me siguri kanë një arsye më shumë për të ruajtur zakonin e tyre të shëndetshëm. (Wired)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.