J&J, nga vaksinë shpëtimtare, në rezervë / Pavarësisht se me 1 dozë ka normën më të ulët të administrimit
Në kulmin e krizës së mungesës së vaksinave në Europë gjatë Marsit, vaksina me një dozë e Johnson & Johnson shihej si injeksioni që do të bënte diferencën Megjithatë, 2 muaj pas prezantimit, vaksina ka numrin më të ulët të administrimeve të 4 vaksinave të miratuara. Problemet me furnizimin, sigurinë, përmirësimi i dërgesave të vaksinave rivale dhe strategjitë e imunizimit të vendeve, kanë ndikuar tek mospërdorimi i J&J. Pavarësisht avantazhit të qartë logjistik të vaksinës që nuk kërkon një dozë të 2-të nxitëse, Bashkimi Europian ka administruar vetëm gjysmën e dozave të dërguara, një normë shumë më e ulët se çdo vaksinë rivale, përfshirë AstraZeneca, që ka patur të njëjtat probleme. Ky është lajm negativ për J&J dhe rrit gjithashtu dyshimet mbi efektshmërinë e fushatës së imunizimit në BE. Problemet me furnizimin e vaksinave kanë trazuar zyrtarët në Bruksel, që kanë vendosur të mos marrin opsionin e porositjes së 100 milionë dozave shtesë të J&J. Sipas burimeve, nëse do të porositeshin, dozat shtesë me shumë gjasa do dhurohen në vendet jashtë bllokut. Prej dozave të marra, vetëm gjysma, apo 6 milionë, janë administruar, sipas Qendrës Europiane për Parandalimin e Sëmundjeve. Për krahasim, 90% e thuajse 250 milionë vaksinave të Pfzier janë administruar dhe rreth 85% të 30 milionë dozave të Moderna. Prej 70 milionë dozave të AstraZeneca, që ka pasur të njëjtat probleme me dërgesat dhe sigurinë, 75% janë injektuar tek banorët në BE.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.