Johnson kërcënon BE – Nuk do ju paguajmë paratë deri sa të na jepni një marrëveshje më të mirë
Boris Johnson është emri numër një në listën e pasardhësve të Theresa May në Downing Street. Ish Kryetari i Bashkisë së Londrës, ish numri një i diplomacisë britanike si dhe një ndër njerëzit që ideoi Brexit, u shpreh së fundmi se, në rast se, Britanisë nuk do t`i jepet një ujdi më e mirë për daljen nga unioni, atëherë, ai, si Kryeministër i vendit, do të mbante peng pagesën.
Me arritjen e marrëveshjes, qeveria e kaluar, ajo e Therea May u dakordësua edhe që të paguante 39 miliardë sterlina në formë dëmshpërblimi për Brukselin. Johnson është një prej 11 ligjbërësve në garë për të marrë frerët e ekzekutivit. Kjo është ndërhyrja e parë e fortë e Johnson që prej largimit të May dhe kandidimit të tij për ta pasuar atë. Ky premtim shënjestrën drejtpërdrejtë krahun pro Brexit të konservatorëve.
“Mendoj se miqtë tanë dhe partnerët duhet të kuptojnë se, paratë do të mbahen deri sa në të kemi më shumë qartësi për rrugën përpara. Në arritjen e një marrëveshje të mirë, paratë janë një lubrifikant i mirë”-nënvizoi Boris Johnson. Nga ana tjetër, Franca ka reaguar ashpër ndaj kësaj deklarate. Sipas burimeve të brendshme nga presidenti Macron për agjencinë e lajmeve Reuters, qeveria franceze ka qëndrimin se, mospagesa e këtij detyrimi është e barabartë me falimentim, ose mospagesë të borxhit sovran.
“Mosrespektimi i detyrimeve të pagesës është një dështim ndërkombëtar i barabartë me mospagesë të borxhit, pasojat e të cilit dihen”-thotë burimi për Reuters. Prej kohësh, Brukseli nuk pranon që të ri negociojë marrëveshjen e Brexit, ndërkohë që Britania e ka të pamundur ta miratojë në Parlament marrëveshjen e arritur. Pikërisht ky dështim solli edhe dorëheqjen e Theresa May.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.