Johnson ndërron qëndrim – “Britania do të paguajë, kërkon periudhë tranzicioni të daljes”
Sekretari i Jashtëm Boris Johnson tha se Britania do të duhet të paguajë për të dalë nga Bashkimi Europian, duke iu bashkuar gjithashtu zyrtarëve të tjerë që mbështesin Brexit, për një periudhë disa vjeçare të tranzicionit.
Në muajin e kaluar, Johnson tha se shuma e parasë që kërkonte Bashkimi Europian, prej 100 miliardë euro, ishte shumë e lartë, duke refuzuar pagesën.
Duke sjellë një tjetër tërheqje të planeve të tyre, zyrtarët e fushatës pro-Brexit, ranë dakord mbi idenë e një periudhe të tranzicionit, për të lehtësuar efektet e daljes nga unioni.
Fjalët e Johsnon vijnë ndërkohë që raundi i dytë i negociatave fillon në javën e ardhshme në Bruksel. Arritja e një dakordësie mbi shumën që Britania do të paguajë ndërkohë që del nga Bashkimi Europian, përbën një nga pengesat kryesore në vazhdimin e negociatave.
Qeveria e kryeministres Theresa May ka publikuar një seri dokumentesh kohët e fundit, duke treguar gatishmërinë për kompromis në disa çështje, si roli i Gjykatës Europiane të Drejtësisë.
Megjithatë, në lidhje me çështjet financiare, kryeministrja nuk ka reaguar. Analistët vlerësojnë se Bashkimi Europian kërkon një faturë prej rreth 100 miliardë euro, vlerë e bazuar në angazhimet e mëparshme të vendit ndaj buxhetit të bllokut.
Zyrtarët në Britani argumentojnë se pagesa mund të përcaktohet pjesërisht në bazë të aksesit të ardhshëm që vendi do të ketë në tregjet e Bashkimit Europian.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.