Juncker: Brexit, një shkatërrim – Presidenti i Komisionit, pesimist për dalje të organizuar
Presidenti i Komisionit Europian, Jean-Claude Juncker, deklaroi se nuk ishte aspak optimist për shanset e Britanisë për të dalë me një marrëveshje nga Bashkimi Europian. Gjithashtu, Juncker paralajmëroi se, çdo dështim për të arritur një marrëveshje do të ishte ekonomikisht shumë i kushtueshëm.
“Kemi çështjen e Brexit, i cili është një shkatërrim dhe aspak konstruktiv. Brexit është e shkuara, jo e ardhmja. Pra, ne po bëjmë përpjekjet më të mëdha, në mënyrë që të kemi një Brexit të rregullt, të organizuar dhe të civilizuar”, tha Juncker. Komentet e Jean-Claude Juncker vijnë vetëm një ditë pasi u takua me kryeministren e Britanisë, Theresa May, ku ai u shpreh se bisedimet ishin konstruktive. Ndërkohë, që data 29 mars po vjen me shpejtësi, që është vendosur si afati zyrtar për të dalë nga unioni, Mbretëria e Bashkuar është zhytur në krizën më të thellë politike në gjysëm shekulli, dhe po lufton se si të dalë nga projekti europian që iu bashkua në vitin 1973.
Në përpjekjen e radhës për të arritur një marrëveshje, ministri i Brexit, Steve Barclay dhe Prokurori i Përgjithshëm, Geoffrey Cox, kanë mbërritur në Bruksel për të biseduar me negociatorin europian të Brexit, Michel Barnier. Dy negociatorët parashikohet të vijnë me propozime të hollësishme. Nëse nuk do të ketë asnjë dakordësi deri javën e ardhshme, atëherë ligjvënësit në Britani do të votojnë për një mocion të përgjithshëm për Brexit, dhe mund të ketë ndryshime të tjera.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.