Juncker jep lajmin i pari: “Duhet të integrojmë Ballkanin, përndryshe do i shohim në luftë”
Vetëm pak orë përpara prezantimit të raportit të Komisionit Europian për rajonin, numri një i këtij institucioni, Jean Claude Juncker dha nga Starsburgu gjatë punimeve të Parlamentit Europian, ndoshta deklaratën më të fortë në favor të integrimit të rajonit në union.
“Nëse ne nuk hapemi ndaj këtyre vendeve që gjenden në një rajon të komplikuar dhe me një fat tragjik, nëse nuk i japim atyre perspektivën europiane, ne do të shohim rikthimin e luftës në rajon, ashtu siç e pamë këtë të ndodhte në vitet `90”, deklaroi numri një i krahut ekzekutiv të Bashkimit Europian.
“Unë nuk dua të shoh luftën të rikthehet në Ballkan e për këtë arsye ne duhet të hapemi ndaj tyre”, u shpreh ai, duke dhënë praktikisht i pari zyrtarisht lajmin për rekomandimin pozitiv të Komisionit Europian për çeljen e negociatave.
Junkcer ka qenë vazhdimisht një ndër mbështetësit e integrimit të Ballkanit në Bashkimin Europian, duke i diktuar kështu institucionit që ai drejton një axhendë pro zgjerimit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.