Ka ende skepticizëm për vaksinën. Autoritetet përpiqen të sigurojnë njerëzit përpara vaksinimit në masë
Një pjesë e njerëzve besojnë tek teoritë konspirative mbi koronavirusin dhe vaksinën, paralajmërojnë ekspertët, ndërkohë që disa vende po përgatiten të shpërndajnë vaksinat në masë, që të kontrollojnë pandeminë. Britania nis këtë javë programin e vaksinimit dhe vende të tjera pritet të ndjekin së shpejti, e për rrjedhojë qeveritë po përpiqen të sigurojnë njerëzit mbi sigurinë e vaksinës.
Në Shtetet e Bashkuara, presidenti i zgjedhur Joe Biden, tha se do të marrë vaksinën publikisht, në mënyrë që të vërtetojë sigurinë. Daniel Freeman, profesor i psikologjisë klinike tek universiteti i Oksfordit, tha se besimet mbi teoritë konspirative janë përhapur në masë dhe nuk përmbahen dot më. Sipas tij, një në dhjetë britanikë kanë normë të lartë të pranimit të këtyre teorive. Organizata Botërore e Shëndetësisë vlerëson se një normë e mbulimit prej 65-70% e vaksinës është e nevojshme për të arritur imunitetin në popullsi përmes injeksionit.
Megjithatë, ideja e imunitetit në tufë supozon se vaksina parandalon transmetimin dhe jo vetë sëmundjen. Një sondazh në Britani muajin e kaluar tregoi se thuajse 2/3 e njerëzve do ta merrnin vaksinën. Por shumë kanë shprehur shqetësime mbi shpejtësinë nën të cilën kompanitë kanë zhvilluar injeksionin. Bazuar tek provat e publikuara nga Moderna dhe Pfizer, efektet anësore nuk kanë qenë serioze apo afat-gjata.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.