A ka mjaftueshëm farmaci? – Në Shqipëri 58.5 për 100 mijë banorë, të tretët nga fundi në Europë
Shqipëria numëron 1679 farmaci në të gjithë territorin e saj, ku thuajse gjysma janë në Tiranë, ose më saktë 43.4% të totalit.
Eurostat nga ana tjetër ka bërë një analizë me vendet europiane që kanë më shumë farmacistë praktikantë, pra farmaci për çdo 100 mijë banorë. Numri i farmacive për 100 mijë banorë në Europë varion nga 21 në Hollandë, në 129 në Maltë.
Në Shqipëri ndërkohë, kjo shifër fiksohet në 58.5 farmaci për çdo 100 mijë banorë. Një raport i tillë do ta vendoste vendin tonë të tretin nga fundi në Europë, më mirë vetëm se Holanda dhe Danimarka.
Sa i përket numrit të farmacistëve në vendin tonë ndërkohë, Eurostat flet për rreth 2300 të tillë në total. Pra, një pjesë e tyre nuk janë aktivë në profesion.
Gjithsesi, numri i vogël i farmacive në Shqipëri, tregon se, ky treg ka mundësi për zgjerim të mëtejshëm, çka do të ishte frytdhënëse jo vetëm për pacientët, të cilët do të kishin në dispozicion më shumë farmacistë, por edhe për vetë këtë lloj biznesi në tërësi.
Të dhënat tregojnë gjithashtu për një shpërndarje mjaft të pabarabartë të farmacive dhe farmacistëve në territorin e Republikës. Ndërkohë që në Tiranë ka një farmaci për 995 banorë, në Malësinë e Madhe ka një farmaci për çdo 12333 banorë. Pra, Tirana ka 136 farmaci për çdo 100 mijë banorë, më shumë se çdo vend tjetër i Europës, çka tregon ndoshta se, në kryeqytet tregu është i tejngopur.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.