Kadastra krijon ALBSCAD, regjistri i pronave – Akses të drejtpërdrejtë SPAK, Gjykatat, ILDKPKI. Noterët vetëm pas autorizimit nga klientët
39 institucione shtetërore do të kenë në total akses të drejpërdrejtë në regjistrat e hartat e kadastrës, ndërkohë që të parat në listë janë gjykatat, prokuroritë e të gjitha niveleve, SPAK, organet e Vetting-ut, ILDKPI, Drejtoria e Pastrimit të Parave, apo ajo e Administrimit të Pasurive të Konfiskuara. Përmes një vendimi të publikuar tashmë në Fletoren Zyrtare, Këshilli I Ministrave ka përcaktuar institucionet që kanë të drejtën e aksesit në kadastrën digjitale dhe të kritereve që duhet të plotësojnë personat juridikë/fizikë, vendas apo të huaj, që kanë të drejtën e marrjes së kodit hyrës.
Agjencia e Kadastrës ka krijuar tashmë “Bazën shtetërore të të dhënave kadastrale– ALBSCAD”, ku përfshihet së pari dokumentacioni tekniko-ligjor i pasurisë së paluajtshme dhe dokumentacioni që administrohet në kuadër të proceseve kalimtare të pronësisë, i cili merret si drejtpërdrejt nga sistemi me aplikimin për shërbim nga platformat digjitale, ashtu edhe në format shkresor; b) skedat digjitale të pasurive të paluajtshme; c) hartat kadastrale të pasurive të paluajtshme; ç) aktet administrative (urdhra, vendime etj.) dhe aktet kadastrale të krijuara nga veprimtaria administrative e ASHK-së mbi pasuritë e paluajtshme.
Në vendim përcaktohet se Institucionet shtetërore që ushtrojnë ndjekjen penale dhe agjencitë ligjzbatuese kanë akses të drejtpërdrejtë si përdorues në bazën shtetërore të të dhënave kadastrale, ALBSCAD.
E drejta e hyrjes në ALBSCAD mundësohet me paraqitjen e kërkesës nga institucioni përkatës dhe, brenda 2 (dy) ditëve nga paraqitja e saj, Drejtoria e Përgjithshme e ASHK-së pajis institucionin me kodin hyrës.
Me pajisjen me kodin hyrës, institucionet sipas kanë drejtë të konsultojnë të dhënat e ALBSCAD-it dhe të printojnë ekstrakte. Për noterët publikë, e drejta e leximit dhe e printimit të ekstrakteve që tregojnë gjendjen juridike të pasurive të paluajtshme bëhet vetëm pasi të jetë marrë autorizimi me shkrim nga pala e interesuar, sipas përcaktimeve të nenit 126, të ligjit nr. 110/2018, “Për noterinë”.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.