Kalim i paligjshem i kufirit – Policia arreston dhe gjobit 6 shtetas
Policia Kufitare ka marrë masa shtesë për parandalimin dhe goditjen e kalimit të paligjshëm të kufirit si edhe ka forcuar kontrollet e kamionëve dhe auto veturave si dhe të dokumentacionit të udhëtarëve.
Si rezultat i kontrolleve të shtuara, gjatë 24 orëve të fundit janë kapur 6 shtetas të cilët tentuan të kalonin Portin e Durrësit duke iu shmangur kontrollit të dokumentacionit. Gjashtë shtetasit, të cilët rezultuan me probleme për të lëvizur në zonën Schengen janë ndëshkuar me masë administrative 20 mijë lekë të reja gjobë secili.
Gjithashtu, janë arrestuar në flagrancë dy drejtues kamionësh, të cilët kundrejt vlerës 1500 – 2500 euro për person kishin fshehur në kamionët e tyre dy shtetas për të kaluar në mënyrë të paligjshme kufirin si dhe është kapur dhe ndaluar një shtetase e shpallur në kërkim ndërkombëtar nga drejtësia italiane.
Policia ka njoftuar se janë sekuestruar dhe vlera monetare në euro dhe paund.
Shërbimet e Policisë Kufitare të Portit Durrës kanë gjetur të fshehur poshtë kamionit dy shtetas shqiptarë, me qëllim për të kaluar në mënyrë të paligjshme kufirin drejt Italisë: Z.GJ, 39 vjeç, banues në Lezhë, i dënuar më parë në Belgjikë për trafikim të lëndëve narkotike, si dhe shtetasi E.P, 31 vjeç, banues në Lezhë. Sipas policisë, pas verifikimit të bërë në sistemin TIMS, rezultoi se shtetasi Z.GJ, ishte i deportuar nga shteti Belg në datën 18.07.2018, pasi kishte vuajtur atje dënimin me 7 muaj burg, për veprën penale ”Kultivim Canabisi”. Shtetasi E.P, ishte i deportuar nga shteti Holandez në datën 07.05.2017, pasi kishte tentuar të kalonte kufirin shtetëror Holandez në mënyrë të paligjshme për të shkuar në Mbretërinë e Bashkuar, duke u fshehur poshtë një kamioni. Në përfundim të dy shtetasit janë ndëshkuar me masë administrative për shmangie të verifikimit kufitar me 20 mijë lekë të reja gjobë secili.
Po gjatë kontrolleve u kap shtetasi Z.C, 17 vjeç, lindur në Shijak, duke kaluar në mënyrë të paligjshme rrethimin e jashtëm me qëllim për të kaluar në tragetin e linjës Durrës-Ancona. Ky shtetas u procedua me gjobë 20 mijë lekë të reja për shmangie të verifikimit kufitar.Njëkohësisht gjatë kontrollit në sheshin e eksporteve i fshehur poshtë një kamioni u kap shtetasi D. S. 22 vjeç, lindur në Dibër. Ky shtetas qëndronte i fshehur poshtë kamionit midis gomave, me qëllim për të kaluar me traget drejt Italisë, i cili u procedua për shmangie të verifikimit kufitar me 20 mijë lekë të reja gjobë.
Gjithashtu gjatë kontrollit në vijën e dytë të kamionit me drejtues shtetasin E.R, 39 vjeç, banues në Tiranë, u gjet i fshehur në kabinën e kamionit, tek krevati i shoferit, shtetasi G.T, 37 vjeç, lindur ne Kosovë.
Ky shtetas do të kalonte kufirin në mënyre të paligjshme me linjën Durrës Ankona për në Itali, duke paguar shoferin E. R me 1 500 euro.
Drejtuesi i kamionit shtetasi E. R u arrestua në flagrancë ndërsa shtetasi G.T, u ndëshkua me masë administrative gjobë në masën 20 mijë lekë të reja.
Policia ka thëne nëpërmjet njoftimit të saj se rreth orës 17:58 gjatë kontrollit të mjetit me drejtues shtetasin K.Gj, 40 vjeç, banues në Tiranë gjatë kontrollit brenda në kamion u gjet i fshehur shtetasi E. N. 23 vjeç, lindur ne Dibër.
Ky shtetas do të kalonte kufirin në mënyrë të paligjshme duke u ndihmuar nga shoferi kamionit. Kamioni ishte i pumbosur dhe shoferi kishte prerë litarin dhe e kishte futur brenda nga mushamaja e trajlerit.
Nga kontrolli në sistemin TIMS ky shtetas është kthyer deportiv nga Norvegjia me motivin kapur me qëndrim ilegal në tejkalim të afateve të qëndrimit dhe punësim ilegal. Dënim me afat 2 vjeçar dhënë në Norvegji, dhe për të kaluar në Itali do të paguante 2 500 euro shoferin K.Gj,
Drejtuesi i kamionit K.Gj u arrestua në flagrancë ndërsa shtetasi E.N u ndëshkua me masë administrative gjobë në masën 20 mijë lekë të reja.
Po gjatë 24 orëve të fundit nga shërbimet e Policisë Kufitare Durrës u kap shtetësia në kërkim R.K, 41 vjeçe, banuese në Tiranë. Pas verifikimeve të kryera rezultoi se kjo shtetase ishte në kërkim ndërkombëtar nga autoritetet gjyqësore italiane, për arsye se është dënuar me 10 vjet e 7 muaj e 11 ditë burgim, për veprat penale “Pjesëmarrje në organizatë kriminale/grup kriminal për lendet narkotike”, të parashikuar nga Kodi Penal Italian. Pjesa e mbetur e dënimit është 3 vjet e 11 muaj e 9 ditë burgim. Ndalimi i saj u bë me qëllim ekstradimi drejt Italisë .
Stacioni i Policisë Kufitare Port Durrës ka njoftuar se po vazhdon punën për të goditur kalimet e paligjshme të kufirit duke forcuar kontrollet për verifikimet kufitare.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.