Kalon Vetting-un Kryegjyqtari i SPAK/ Sandër Simoni konfirmohet në detyrë, shkarkohet Marsela Balili për probleme me pasurinë!
Kreu i Gjykatës së Posaçme Kundër Korrupsionit e Krimit të Organizuar, Sandër Simoni, ka kaluar me sukses sitën e Vetting-ut. Ai u konfirmua të premten në detyrë nga Komisioni i Pavarur i Kualifikimit pasi ju nënshtrua procesit të rivlerësimit për të tre komponentët, pasurinë, integritetin dhe profesionalizmin. Ndërsa nuk kishte probleme me komponentët e profesionalizmit dhe integritetit profesional, ishte pasuria ajo për të cilën Simonit ju desh të jepte shpjegime para trupës së Vetting-ut.
Në përgjithësi Sandër Simoni, dhe e shoqja e tij që ushtron profesionin e noteres mbulonim me të ardhura të ligjshme pronat dhe shpenzimet, por Komisioni i Pavarur i Kualifikimit vuri në pikëpyetje një apartament me sipërfaqe 116 m në Tiranë, blerë 6.5 milion lekë përmes një kredie preferenciale me vlerë 5 milionë lekë. Trupit gjykues ngriti dyshime mbi vlerën e apartamentit, e cila sipas relatorit të çështjes ishte shumë më e lirë se tregu, shkak për të cilin Komisioni i kishte kërkuar kompanisë ndërtuese të paraqiste edhe kontrata të tjera shitjeje në po atë pallat. Sipas Komisionit, nga përgjigjet e kompanisë, rezultonte se apartamenti qe blerë nga gjyqtari me çmim më të ulët se blerësit e tjerë, ndërkohë që nuk ekziston dyshim për konflikt interesi mes tij e firmës ndërtuese.
Po ashtu pikëpyetje u vunë edhe mbi dy hua, njëra prej 1.4 milionë lekësh nga gjyqtari dhe tjetra prej 30 mijë eurosh nga bashkëshortja e tij në favor të vëllait të gjyqtarit. Huq që ishte përdorur nga vëllai i tij me banim në SHBA për blerjen e një apartamenti dhe garazhi në Tiranë. Edhe në këtë pikë Komisioni kërkoi më shumë informacion duke qenë se ekzistonin dyshime se apartamenti zotërohej nga gjyqtari.
Dyshim për çmim shumë të lirë u ngrit edhe mbi një mjet BENZ të blerë nga bashkëshortja e gjyqtarit për 840 mije lekë, por sipas verifikimeve të Komisionit vlera e tij reale pas zhdoganimit arrinte në mbi 1.1 milionë lekë. Duket se shpjegimet e dhëna nga Sandër Simoni bindën Komisionin i cili në fund vendosi ta konfirmojë në detyrë.
Ndërkohë që nuk e ka pasur këtë fat vartësja e tij, Marsela Balili, anëtare e Gjykatës Speciale Kundër Korrupsionit e Krimit të Organizuar. Ajo u shkarkua nga detyra për shkak të problemeve me pasurinë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.