Kampet e emigrantëve afër detit – Greqia premton të përmirësojë kushtet

Greqia është zotuar të përmirësojë kushtet e jetesës për refugjatët që mbahen në kampet e ndalimit në ishujt e detit Egje.

“Ne do të bëjmë çdo përpjekje për të përmirësuar kushtet e jetesës në ishujt e Egjeut Lindor“, tha Ministri i Migracionit Dimitris Vitsas.

Evropa ka qenë destinacioni i qindra mijëra refugjatëve nga zonat e krizës në Azi dhe Afrikë vitet e fundit. Veçanërisht kur filloi kriza në vitin 2015, shumë nga refugjatët shkuan në Greqi, një nga destinacionet më të afërta në Evropë.

Ndërsa numri i emigrantëve u rrit, Greqia dhe vendet e tjera evropiane filluan të ndiheshin të “pushtuar”, duke mbyllur kufijtë e tyre për emigrantët ose duke i dërguar ata në kampet e paraburgimit.

Vitsas tha se numri i emigrantëve gati u dyfishua këtë verë në krahasim me vitin e kaluar në ishujt grekë të Lesbos, Kos, Samos, Chios dhe Leros, portat kryesore në Evropë për refugjatët që kryesisht largoheshin nga konfliktet në Siri, Irak dhe Afganistan nëpërmjet Turqisë.

“Të dielën, 416 njerëz arritën në ishuj, duke përfshirë 324 në Lesbos,” tha Vitsas. Ai shtoi gjithashtu se Bashkimi Europian (BE) “nuk ka bërë mjaftueshëm për t’u marrë me fluksin e emigrantëve në Mesdheun lindor”.

Vitsas, së bashku me kryeministrin Alexis Tsipras, do të takohen së shpejti në Athinë, me komisionerin evropian të migracionit Dimitris Avramopulos, për të diskutuar rreth kësaj situate. Të dhënat e qeverisë treguan se në Lesbos kishte më shumë se 11,000 refugjatë, duke përfshirë afërsisht 9,000 në kampin Moria, gati trefishin e kapacitetit nominal. Bamirësia mjekësore “Mjekët pa Kufij” paralajmëruan të hënën se kushtet e tmerrshme në kampet e mbipopulluara në Lezbos po çonin në përpjekje për vetëvrasje dhe i vinin refugjatët në rrezik të lartë shëndetësor.

Shumica e vendeve ku shkojnë fillimisht emigrantët janë ankuar për mungesën e bashkëpunimit nga shtetet e tjera anëtare të BE, ndërkohë që kjo e fundit është e detyruar t’i “shpërndajë” emigrantët në vendet e saj.

e.t/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.