Kampet për emigrantë – Reagon Ministria e Brendshme: Nuk është një çështje në shqyrtim

“Ndërtimi i kampeve për emigrantë nuk është një çështje në shqyrtim apo në diskutim. Askush nuk e ka kërkuar deri më sot dhe askush nuk e ka ofruar një gjë të tillë.”

Ky është reagimi i Ministrisë së Brendshme lidhur me spekulimet e krijuara ditët e fundit mbi mundësinë e ngritjes së një kampi refugjatësh në Shqipëri, pas transmetimit të një kronike televizive disa ditë më parë në rrjetin gjerman ZDF.

Së bashku me sqarimin, Ministria ka sjellë në vëmendje edhe deklaratën e zëvendësministrit të Brendshëm për ZDF:

“Çfarë mund të bënte Shqipëria në kushtet e një emergjence imigrantësh?”
Përgjigjja e kësaj pyetjeje është ajo që citohet: “Shqipëria e ka treguar gjatë luftës së Kosovës se është në gjendje të përballojë këto emergjenca”.

“Pra përgjigjja lidhet me një situatë hipotetike humanitare emergjence, si ajo gjatë luftës së Kosovës ku pati një angazhim shtetëror e popullor, dhe jo mbi një diskutim nëse një kamp mund të ndërtohet ose jo në Shqipëri,” thuhet ndër të tjera në sqarimin e MB.

SCAN

Shqipëria me kamp refugjatësh? – Voda: Jo! Nuk kemi kërkesa nga BE, pavarësisht fluksit

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.