Kancelari austriak do të jetë lideri i parë europian që viziton Putin që nga pushtimi i Ukrainës!

Kancelari austriak Karl Nehammer do të jetë lideri i parë europian që do të zhvillojë bisedime ballë për ballë me presidentin rus Vladimir Putin që kur Moska pushtoi Ukrainën. Nehammer po udhëton për në kryeqytetin rus të hënën dhe tha se ai synonte të vepronte si një “urë-ndërtues” midis Moskës dhe Kievit.

Ai tha se shpreson të “bëjë gjithçka që është e mundur për ta ndalur (luftën)” dhe “të sigurojë që të ndërmerren hapa në drejtim të paqes”. “Ne jemi ushtarakisht neutralë, por ka përjashtime nga neutraliteti. Ne nuk jemi neutralë kur bëhet fjalë për emërtimin e krimeve dhe diskutimin e tyre,” tha ai në një konferencë të përbashkët shtypi me presidentin ukrainas Volodymyr Zelenskyy në Kiev të shtunën.

Austria nuk është anëtare e NATO-s, pasi e ka deklaruar veten përgjithmonë neutrale në vitin 1955. Vendi alpin nuk ka dërguar armë në Ukrainë, në vend të kësaj ka ofruar ndihmë humanitare dhe forca të blinduara dhe helmeta për civilët. Nehammer, një konservator, tha më parë se ai ishte prekur nga bisedat e tij me Zelenskyy dhe deklaroi se dëshiron të tregojë mbështetje. Ndërsa ishte në Ukrainë, Nehammer vizitoi gjithashtu qytetin Bucha, vendi i krimeve të supozuara të luftës të kryera nga trupat ruse — diçka që shumë presin që ai të diskutojë me Putin.

“Është e nevojshme që OKB të hetojë këto shkelje, që drejtësia ndërkombëtare të fillojë punën e saj,” tha ai në Kiev. “Dihet që rrotat e prokurorisë ndërkombëtare rrotullohen ngadalë, por ato rrotullohen vazhdimisht dhe me këmbëngulje dhe kjo është ajo që po ndodh në këtë moment.”

Pas njoftimit për vizitën e Nehammerit në Kremlin, kritikat për planet e tij u shfaqën në disa media në gjuhën gjermane dhe nga të paktën një zyrtar ukrainas. Sergei Orlov, nënkryetar i bashkisë së qytetit të rrethuar ukrainas të Mariupolit, i tha gazetës gjermane Bild se një udhëtim i tillë ishte i papranueshëm për momentin.

“Krimet e luftës që Rusia po kryen tani në tokën ukrainase ende po ndodhin,” tha Orlov gjatë një transmetimi televiziv. “Nuk e kuptoj se si mund të bëhet një bisedë me Putin në këtë kohë, si mund të bëhet biznes me të”.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.