“Kanionet e Skraparit nuk do të preken” – Pezullohet leja e ndërtimit të HEC-it, individët e përfshirë do kallëzohen në Prokurori
Kanionet e Skraparit nuk do të preken, dhe nuk do të ketë asnjë ndërtim HEC-sh. Ministri Blendi Klosi gjatë inspektimit të kanioneve ka bërë të ditur se është pezulluar koncesioni për ndërtimin e hidrocentralit mbi kanionet e Osumit.
Nga ana tjetër Kryeministri Rama nëpërmjet një postimi në facebook deklaron se të gjithë individët e përfshirë në falsifikimin e dokumenteve do të kallëzohen në prokurori.
“Nuk do të ketë HEC mbi kanione. Ndërtimi i tij do të prishte jo vetëm bukuritë e kësaj zone, jemi këtu për të verifikuar gjithë këtë situatë që kemi me lejen e mjedisit. Po të shikosh letrat e ligjet quhet që jemi jo në zonën e mbrojtur, mbase quhet që jemi dhe larg ujëvarës, por ujëvara është larg vetëm 200 metra dhe transformohet nga një ujëvarë e bukur dhe të rrjedhshëm në një zonë me ujë të komanduar. Padyshim për ne është një shfaqje e shëmtuar në mënyrën se si e kemi trajtuar mjedisin këto 20 vjet. Kjo nuk është përpjekja e parë, është përpjekja e disata herë për të bllokuar edhe HEC-e të tjera, të cilat kanë shfrytëzuar hapësira të ndryshme ligjore apo kanë mashtruar me koordinatat, duke e bërë pastaj gjithë procesin një proces të palikujduar. Jemi këtu për të mos lejuar këtë ndërtim, po ndjekim gjithë proceduar ligjore, shteti do të mbajë edhe proceset e tij investigative. Ne do të çojmë për ndjekje penale këdo zyrtar të shtetit që ka ndikuar dhe lejuar që në disa dokumente të falsifikuara të jepen këto leje mjedisore, e pastaj leja e shfrytëzimit të ujit e ajo e ndërtimit e me radhë”, deklaroi Klosi.
“Ministri i Mjedisit Blendi Klosi nisi hetimin administrativ të lejes mjedisore. E cila rezultoi një fabrikim kriminal me koordinata të manipuluara. Individët e përfshirë në këtë fabrikim do të kallëzohen në prokurori, ndërsa e gjithë procedura do të anulohet. Falënderoj qytetarët që na e çuan të parët këtë sinjal përmes Platformës së Bashkëqeverisjes shqiperiaqeduam.al dhe të gjithë të tjerët që u përfshinë në publikimin e këtij krimi të mbetur në tentativë”, shkruan Rama.
Në kanionet e Skraparit, për ti thënë jo shkatërrimit të resurseve natyrore ??
Posted by Blendi Klosi on Friday, February 9, 2018
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.