Kanoset me thikë një biznesmen, i kërkohen 5 mijë euro! Arrestohet i dyshuari

Policia e Shtetit bën me dije se në qytetin e Korçës dyshohet që një biznesmen është kanosur me thikë nga një person duke i kërkuar shumën prej 5000 Euro në këmbim të jetës. Autori me rrezikshmëri të lartë shoqërore, i dënuar më parë për veprën penale “Vrasja me paramendim”  dyshohet të jetë shtetasi E.L 37 vjeç banues në Korçë, njoftoi policia.

Specialistët e Seksionit për Hetimin e Krimeve të Rënda në Drejtorinë Vendore të Policisë Korçë, nën drejtimin e Prokurorisë të Rrethit Gjyqësor Korçë, bënë ndalimin me iniciativë të shtetasit.

Sipas policisë, nga tërësia e veprimeve të kryera shtetasi i lartpërmendur, ka konsumuar elementët e veprës penale “Shtrëngimi me anë të kanosjes ose dhunës për dhënien e pasurisë”. Materialet i kaluan Prokurorisë pranë Gjykatës së Shkallës së Parë Korçë për veprime të mëtejshme hetimore në ngarkim të këtij shtetasi vijon njoftimi I policisë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.