Kantierët e turizmit në një vepër arti! Drejtori i FSHZH, Beci:Turizmi, në fokus të investimeve të programuara edhe për 4-5 vitet e ardhshme
Në Edicionin e 2-të të Panairit Ndërkombëtar të Turizmit ishte pjesëmarrës edhe Fondi Shqiptar i Zhvillimit si agjencia e cila ka zbatuar një numër të konsiderueshëm projektesh me impakt të rëndësishëm në zhvillimin e sektorit të turizmit.
“Prej 25 vitesh Fondi Shqiptar i Zhvillimit ka qenë aktiv në investimet sektoriale në rrugë, ujësjellësa, shkolla, qendra komunitare, etj. Vitet e fundit zhvillimi ekonomik gjithmonë e më shumë shihet në mënyrë të integruar. Besojmë se qasja e re e qeverisë për një zhvillim të integruar rajonal është efikase për rritjen ekonomike të Shqipërisë. Kjo qasje shfaqet më qartë te zhvilllimi turistik, pasi është sektori ku ndërthuren të gjithë sektorët e tjerë” tha Drejtori Ekzekutiv i FSHZH, Beci.
Fondi Shqiptar i Zhvillimit ka rritur angazhimin në projektet e infrastrukturës me fokus turizmin duke ndërthurur kapacitetet profesionale dhe përvojën e gjatë në investimet sektoriale.
Vetëm gjatë vitit 2017, qeveria dhe donatorët i kanë besuar zbatimin e 7 programeve madhore për zhvillimin e turizmit nga jugu në veri. Investimet infrastrukturore në drejtim të turizmit në të gjithë vendin kapin shifrën e 400 milionë Eurove të financuara nga qeveria shqiptare dhe donatorë të huaj.
Sipas Becit, rruga Shkodër – Vermosh, rruga Kukës – Shishtavec, ndërtimi i infrastrukturës turistike në Valbonë, rikualifikimi urban në Pukë e të tjera investime të kryera në veri të vendit kanë dhënë akses në destinacione të reja dhe kanë përmirësuar ato ekzistuese.
Masterplani i Alpeve është një tjetër produkt i rëndësishëm për nga vizioni dhe modeli që sjell mbi qasjen dhe standardet që duhen për të garantuar një zhvillim të qëndrueshëm të sektorit turistik.
Fondet e qeverisë shqiptare janë fokusuar në mënyrë të drejtpërdrejtë në turizëm. Rruga Shkodër – Velipojë, rruga Cërrik – Belsh – Kuçovë, unaza e Pogradecit, etj. synojnë pikërisht të përmirësojnë atë që mbetet një pikë e rëndësishme e zhvillimit të sektorit: infrastrukturën.
Pas përfundimit të Lungomares dhe shëtitores në Himarë, investimet turistike në qarkun e Vlorës po vijojnë me sistemimin e infrastrukturës në plazhet e Jalës e Dhërmiut dhe me rehabilitimin e fshatrave të Vunoit e Dhërmiut të cilat pritet të mbarojnë brenda këtij viti.
Ndërkohë, Fondi po punon për zhvillimin e infrastrukturës dhe produkteve turistike në bashkitë Përmet, Sarandë, Berat e Gjirokastër.
Një projekt i financuar nga Banka Botërore me rreth 64 milionë Euro ka për objektiv integrimin e këtyre 4 bashkive në një korridor turistik të jugut që ofron gjithçka i duhet një turisti për një përvojë që mbahet mend gjatë.
Si një ndër sektorët prioritarë të zhvillimit ekonomik, turizmi është në fokus të investimeve të programuara edhe për 4-5 vitet e ardhshme. Pritet që rreth 500 milionë Euro të investohen në projekte që lidhen drejtpërdrejtë për zhvillimin e turizmit të financuara nga qeveria shqiptare dhe donatorët e huaj nëpërmjet Fondit Shqiptar të Zhvillimit.
Alpet, bregdeti, trashëgimia kulturore e historike u prezantuan në stendën e FSHZH-së, që u cilësua si një ndër atraksionet kryesore të panairit për nga qasja dhe koncepti i zgjedhur. Vizitorët ishin të shumtë në “copëzën” e kantierit të improvizuar në një instalacion artistik.
“Është kënaqësi e veçantë pjesëmarrja në këtë panair. Vijmë pas shumë vitesh pune këmbëngulëse për të realizuar investime komplekse dhe me impakt të drejtpërdrejtë në zhvillimin e qëndrueshëm të sektorit dhe kthimin e tij në një gjenerues të ardhurash për ekonominë.
Sigurisht nuk ka qenë e lehtë dhe gjatë rrugës kemi hasur shumë sfida dhe barriera. Por nuk kemi qenë vetëm. Kemi pasur besimin dhe mbështetjen e vazhdueshme të qeverisë, institucioneve financiare dhe bashkëpunimin e e strukturave të qeverisjes vendore” tha Beci.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.