Karburanti i administratës – APP autoriteteve: S’ka furnizim pa kartë elektronike
Qeveria miratoi në korrik të vitit të kaluar një vendim që synonte t’i jepte fund praktikave të abuzimit me karburantin nga ana e institucioneve të ndryshme.
Bëhet fjalë për vendimin “Për standardizimin dhe disiplinimin e karburantit në njësitë e qeverisjes së përgjithshme” i cili efektet e tij i ka nisur që 1 janari i këtij viti për gjithë administratën.
Në një njoftim të datës 31 janar 2017 Agjencia e Prokurimit Publik u ka bërë të qartë autoriteteve kontraktore që për çdo prokurim që bëjnë lidhur me karburantet të plotësojnë kërkesat që sanksionon vendimi i qeverisë.
“Sipas parashikimeve të këtij vendimi, Autoritetet Kontraktore duhet të mbajnë në konsideratë se shërbimi i furnizimit me karburant për mjetet e transportit duhet të kryhet vetëm nëpërmjet kartës elektronike e cila të mundësojë identifikimin e mjetit dhe përdoruesin e saj. Sjellim në vëmendjen tuaj se Vendimi i Këshillit të Ministrave i shtrin efektet duke filluar nga data 1 janar 2017”, thuhet në njoftimin e nënshkruar nga drejtori Eduard Ahmeti.
Furnizimi me karburant përmes kartës elektronike rregullon problemin e hershëm të tollonave që në shumë raste rrisnin shpenzimet e institucioneve. E para që zbatoi këtë praktikë ishte Policia e Shtetit në muajin gusht.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.