Kartat e kreditit – Kalojnë pragun e 100 mijë në mesin e këtij viti
Numri i kartave të kreditit të lëshuara nga sistemi bankar shqiptar kaloi pragun e 100 mijë në mesin e këtij viti. Sipas të dhënave nga Banka e Shqipërisë, në fund të muajit qershor numri i kartave të kreditit arriti në rreth 100,600, rreth 4300 më shumë krahasuar me fundin e vitit të kaluar.
Në dekadën e fundit, numri i kartave të kreditit është rritur me afro shtatë herë, megjithatë përdorimi i tyre në Shqipëri ende është modest krahasuar me tregjet më të zhvilluara, qoftë edhe brenda rajonit të Ballkanit Perëndimor.
Kjo lidhet më së shumti me nivelin e lartë të përdorimit të parasë cash në ekonomi dhe me informalitetin. Ndryshe nga kartat e debitit që lidhet me llogarinë rrjedhëse të përdoruesit dhe përdoren më së shumti tërheqjen e parave nga bankomatet, karta e kreditit është një instrument i ndërtuar kryesisht për blerje direkte, përmes terminaleve fizike apo virtuale, në internet.
Nga rreth 1 milionë e 70 mijë karta aktive në mesin e këtij viti, vetëm 9.5% e tyre ishin karta krediti. Shumica e kartave të lëshuara nga sistemi bankar shqiptar i takojnë shoqatave të mëdha globale të pagesave, që mund të përdoren për të kryer pagesa pothuajse në të gjithë botën.
Rreth 72% e kartave bankare janë Visa, të ndjekura nga Master Card me 26%, ndërsa American Express dhe kartat lokale zënë rreth 2% të totalit.
Ndërkohë, instrumente që po njohin rritje të shpejtë në vitet e fundit janë kartat e parasë elektronike. Numri i tyre ka arritur në 60 mijë ose afro 6% e numrit total të kartave të sistemit financiar shqiptar.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.