Kartat e kreditit – Rritje më e ngadaltë për vitin 2019

Numri i kartave të kreditit të lëshuara nga sistemi bankar shqiptar ka arritur në rreth 111 mijë. Mbështetur në të dhënat e Bankës së Shqipërisë, që nga fillimi i vitit e deri në fund të muajit shtator 2019, numri i kartave të kreditit është rritur me rreth 5%. Kjo rritje është ndjeshëm më e ngadaltë krahasuar me ritmin e viteve të mëparshme.

Kartat e kreditit aktualisht përbëjnë rreth 9% të totalit të kartave të lëshuara nga bankat në Shqipëri. Mbi 90% e tyre janë karta debiti të lidhura me llogaritë rrjedhëse, që shumica e njerëzve i përdorin thjesht për të tërhequr paratë nga bankomatet.

Ndërkohë, karta e kreditit është një instrument i ndërtuar kryesisht për blerje direkte, përmes terminaleve fizike, në dyqane apo virtuale, në internet.

Ato ngelen një instrument ende pak i zhvilluar në raport me potencialet e tregut, por edhe me produktet e tjera të kredisë.

Shkalla e ulët e përfshirjes financiare të popullsisë është një faktor që e frenon këtë segment të tregut. Por, nga ana tjetër, kartat e kreditit ngelen relativisht të shtrenjta, krahasuar me produktet e ngjashme të kredisë konsumatore. Kartat e kreditit kanë kosto më të larta për bankat, të lidhura kryesisht me procesimin e transaksioneve.

Pjesë e strategjisë për pagesat me vlerë të vogël është mundësia e krijimit të një sistemi që do të mundësonte shlyerjen kombëtare të këtyre transaksioneve.

Aktualisht, në Shqipëri nuk ka një strukturë kombëtare për shkëmbimin e transaksioneve të pagesave me kartë të zotëruesve të një karte bankare me një terminal POS të një tregtari nga një bankë tjetër. Pjesa më e pajisjeve të pranimit të këtyre kartave janë “të ndërlidhura”, nëpërmjet rrjeteve përpunuese globale të Visa dhe Mastercard.

Ngritja e një sistemi “switch” kombëtar do të ulte ndjeshëm kostot e kryerjes të pagesave me kartë brenda vendit dhe, eventualisht, do të krijonte hapësira për të ulur komisionet dhe interesat që shqiptarët paguajnë për veprimet e kryera me karta krediti.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.