Katalonja si shtet i pavarur – Shanset që ekonomia të vazhdojë e fortë janë kundër separatistëve
Duke iu referuar të dhënave ekonomike, Katalonja duket se do t’ia dilte me sukses si një shtet i pavarur. Rajoni, që zë rreth 1/5-ën e ekonomisë së Spanjës, ka një vlerë të Produktit të Brendshëm Bruto që thuajse krahasohet me Finlandën. Banorët janë mesatarisht më të pasur dhe kanë më shumë shanse që të jenë të punësuar se pjesa tjetër e Spanjës.
Megjithatë, sipas analistëve, shanset që ekonomia të vazhdojë e fortë janë kundër separatistëve. Sipas tyre, Katalonja mund të kthehet në një vend më pak të pasur nëse ndahet, pasi disa kompani të mëdha po ndërmarrin hapa për të transferuar bazat e tyre jashtë rajonit.
Ndër këto përfshihet Banco Sabadell, që është huadhënësi i pestë më i madh i Spanjës, që vendosi ditën e Enjte për të transferuar bazën ligjore jashtë rajonit. Kjo nënkupton se sa më shumë të rriten gjasat e arritjes së pavarësisë, më të mëdha do të jenë edhe shanset që vendet e punës dhe aktiviteti ekonomik të dalë nga rajoni.
Ndarja do të krijonte edhe debate të mëdha mbi taksat dhe borxhin me Madridin. Ekonomistët kanë nënvizuar ndër problemet edhe valutën që Katalonja do të përdorë.
Nëse pavarësia njihet nga vendet e tjera, rajoni nuk ka gjasa të qëndrojë pjesë e Eurozonës. Sipas analistëve, rajoni mund të krijojë një valutë të fiksuar me euron, por banka e re qendrore që do të krijohet do të ketë nevojë për akses në rezervat e këmbimit valutor që qeveria qendrore nuk do të kishte interes ta mbështeste.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.