KE përgatit tarifat, Malmstrom: Lista e mallrave amerikanë do të prekë $20 mld
Komisioni Europian po përgatitet të caktojë tarifa në 20 miliardë dollarë mallra amerikanë, nëse Washingtoni vendos taksa në importe për makinat e prodhuara në Bashkimin Europian, sipas komisioneres së tregtisë, Cecilia Malmstrom.
“Ne shpresojmë që të mos jetë nevoja dhe të gjejmë një zgjidhje. Nëse nuk ndodh, Komisioni po përgatit një listë të gjatë të mallrave amerikanë, që do të prekë vlerën e 20 miliardë dollarëve”, tha ajo.
Tarifat e reja europiane nuk do të shënjestrojnë shtete të veçanta amerikane sipas saj.
“Tashmë do të jenë më shumë mallra të përgjithshëm si produktet bujqësore, makineritë, produktet e teknologjisë së lartë, e të tjera”, shtoi Malmstrom.
Ajo tha se nuk mendon që propozimi i sekretarit të Thesarit Steven Mnuchin për të hequr tarifat është serioz, duke theksuar se Shtetet e Bashkuara kanë ligje dhe subvencione që mbrojnë industritë amerikane.
“Ne e provuam më parë nëpërmjet negociatave të Partneritetit Transatlantik të Tregtisë dhe Investimeve, për të bërë që Amerika të lehtësojë ligjet, por ishte e pamundur”, tha ajo.
Malmstrom është pjesë e delegacionit të Bashkimit Europian në Washington, ku do të zhvillohen bisedimet mbi një marrëveshje afat-gjatë të tregtisë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.