KE, projeksionet për Eurozonën – Performanca e fortë në 2017 pritet të vazhdojë këtë vit edhe tjetrin
Ekonomia europiane ka thyer pritshmëritë vitin e kaluar, ndërkohë që tranzicioni nga rimëkëmbja në ekspansion ekonomik po vazhdon. Norma e rritjes për Eurozonën dhe Bashkimin Europian vlerësohet në 2.4% në 2017-ën, që është më e larta në një dekadë.
Sipas Komisionit Europian, kjo performancë pritet të vazhdojë në këtë vit edhe tjetrin, me 2.3% dhe 2% rritje në mënyrë respektive.
“Duhet të përpiqemi që të mirat e rritjes ekonomike të reflektohen te të gjithë europianët. Gjatë kësaj periudhe duhet të përfitojmë duke bërë ekonomitë më elastike dhe thelluar Unionin Ekonomik dhe Monetar”, tha Valdis Dombrovskis, zv/Presidenti i Komisionit Europian.
Vlerësimi prej 2.4% për vitin 2017 është sipër projeksioneve të vjeshtës nga Komisioni për një rritje me 2.2% të ekonomisë së Eurozonës dhe 2.3% në Bashkimin Europian.
Rritja e projeksioneve për këtë vit edhe tjetrin, sipas Komisionit, vjen kryesisht prej vrullit të fortë ciklik në Europë, në një kohë të fuqizimit të tregut të punës dhe ndjesisë mbi ekonominë, si dhe prej rritjes së aktivitetit ekonomik dhe tregtisë globale.
“Eurozona po regjistron norma të rritjes ekonomike që nuk janë parë që prej krizës financiare. Papunësia dhe deficitet vazhdojnë të bien ndërsa investimet po rriten ndjeshëm”, tha Pierre Moscovici, komisioneri për çështjet ekonomike dhe financiare.
Kërkesa e fortë, shfrytëzimi i madh i kapacitetit dhe kushtet mbështetëse financiare pritet të favorizojnë investimet.
Ndër rreziqe që cenojnë ekonominë, Komisioni Europian thekson rezultatin e pasigurt të negociatave në lidhje me Brexit, tensionet gjeopolitike si dhe kërcënimet nga politikat proteksioniste.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.