KE, raport për Shqipërinë – “Duhen hapa shtesë për çeljen e negociatave në 2019”

Komisioni Europian ka publikuar raportin për situatën ekonomike gjatë tremujorit të dytë në vendet kandidate për t`iu bashkuar unionit. Sa i përket Shqipërisë, theksi vihet te vendimi i Këshillit të Bashkimit Europian për hapjen e negociatave në Qershorin e vitit të ardhshëm. Por, kjo përfshin hapa shtesë në drejtim të luftës kundër korrupsionit dhe krimit të organizuar, thotë Komisioni Europian, si dhe në drejtim të reformës në drejtësi, të shpalosura edhe në njoftimin e qershorit për fatin e negociatave.

Sa i përket sektorit real të ekonomisë, Komisioni Europian vlerëson rritjen më të madhe tremujore në më shumë se tre vite, ndërkohë që thekson faktin se kërkesa e brendshme mbetet e fortë, duke marrë shtysë nga rritja e punësimit dhe rritja e pagave, sidomos në sektorin publik. Edhe zhvillimet më të fundit në tregun e punës shihen me sy pozitiv nga Brukseli zyrtar, që gjithsesi vë theksin te papunësia e të rinjve, ende në nivele mjaft të larta.

Sa i përket zhvillimeve monetare, theksi vihet te rënia e euros dhe ndërhyrja e Bankës së Shqipërisë për të  rikthyer inflacionin brenda objektivit në 3%. “Sektori bankar në tërësi është i mirëkapitalizuar”,- vijon më tej Komisioni Europian. Në drejtim të financave publike ndërkohë, Brukseli vë theksin te rritja nën pritshmëritë e shpenzimeve.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.