KE ul parashikimin e rritjes ekonomike italiane – Dombrovski: Nevojiten reforma të thella për të ulur nivelin e lartë të borxhit
Komisioni Europian uli parashikimet e tij të rritjes ekonomike për Italinë për 2019 dhe 2020, duke argumentuar se pasiguria lidhur me politikat qeveritare dhe kostot më të larta të huamarrjes e shtynë vendin drejt një recesioni në gjysmën e dytë të vitit të kaluar.
Komisioni tha se Prodhimi i Brendshëm Bruto italian ka gjasa të rritet me vetëm 0.2 % në vitin 2019, nga 1.0 % në 2018 dhe kundrejt një parashikimi të rritjes prej 1.2 % që Komisioni bëri nëntorin e kaluar.
Në vitin 2020, ekonomia italiane ka gjasa të zgjerohet me 0.8 për qind, tha Komisioni i cili kishte parashikuar një rritje prej 1.3 % në muajin nëntor të vitit të kaluar.
Kostot e huamarrjes së Italisë u rritën në gjysmën e dytë të vitit 2018, pasi investitorët u shqetësuan se qeveria populiste në Romë do të rriste ndjeshëm shpenzimet pa burime shtesë të të ardhurave edhe pse Italia tashmë ka borxhin e dytë më të lartë në Europë në 132 % të PBB-së. Sipas zëvendëspresidentit të KE, Valdis Dombrovskis, Italia duhet të ndërmarrë reforma të thella për të ulur nivelin e lartë të këtij të fundit.
“Ajo që ka nevojë Italia është reforma e thellë strukturore dhe veprime vendimtare për të ulur nivelin e lartë të borxhit publik, me fjalë të tjera, politika përgjegjëse që mbështesin stabilitetin, besimin dhe investimet”, tha Dombrovskis.
Komisioni parashikon se rritja tremujore e ekonomisë italiane do të jetë zero në tre muajt e parë të 2019, ndërkohë do të rritet vetëm në 0.1 për qind në tremujorin e dytë krahasuar me tre muajt e mëparshëm.
Performanca e dobët ekonomike e Romës ngre pikëpyetje mbi aftësinë e vendit për të arritur objektivin e planifikuar të deficitit buxhetor prej 2.04 për qind të PBB-së këtë vit. Më herët, Komisioni paralajmëroi masa disiplinore për qeverinë italiane, e cila parashikonte një deficit buxhetor në 2.4% të PBB-së, ku më pas kjo e fundit pranoi të ulte objektin në 2.04%.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.