KE ul projeksionet e Eurozonës – Fajëson luftën tregtare, Italia do të ketë normën më të ulët
Komisioni Europian ka ulur projeksionet për ekonominë e Eurozonës këtë vit, duke theksuar se arsyet kryesore të rishikimit ishin lufta tregtare me SHBA dhe rritja e çmimeve të naftës që do të nxisë inflacionin. Ngadalësimi pritet të ndikojë të gjitha ekonomitë e mëdha të bllokut, por pritet të godasë më fortë Italinë, ndërkohë që vendi do të regjistrojë normën më të ulët të rritjes në Europë, që do të arrihet vetëm nga Britania nga të gjitha 28 vendet anëtare të Bashkimit Europian.
Krahu ekzekutiv i Bashkimit Europian vlerësoi se ekonomia e 19 vendeve të Eurozonës do të rritet me 2.1% këtë vit, në rënie nga 2.3% që vlerësohej më parë dhe poshtë normës prej 2.4% që rezultoi në vitin 2017. Vitin e ardhshëm, ekonomia do të ngadalësohet më tej në 2%, normë e pandryshuar nga projeksionet e mëparshme. “Rishikimi në rënie i Produktit të Brendshëm Bruto nga muaji Maj, tregon se mjedisi i pafavorshëm i jashtëm, si lufta tregtare me SHBA, pritet të godasë besimin dhe frenojë rritjen e ekonomisë”, tha zv/Presidenti i Komisionit Valdis Dombrovskis.
Komisioneri për ekonominë, Pierre Moscovici, tha se ndikimi negativ i përplasjes tregtare te ekonomia e Europës do të jetë më i madh në rast të një përshpejtimi të konflikteve. Rritja e çmimeve të naftës do të ndikojë gjithashtu në ngadalësim, sipas Komisionit, ndërkohë që inflacioni pritet të arrijë në 1.7% këtë vit edhe tjetrin, nga 1.5% që vlerësohej më parë. Franca dhe Gjermania, dy ekonomitë më të mëdha, pritet të humbasin vrull këto dy vite. Rritja e PBB të Gjermanisë do të ngadalësohet në 1.9% këtë vit dhe 2019-ën, nga 2.3% dhe 2.1% në mënyrë respektive, që u vlerësua në Maj.
Franca do të rritet me 1.7% këtë vit edhe tjetrin, shumë poshtë normës prej 2.2% që u regjistrua vitin e kaluar. Ekonomia me rritjen më të ngadaltë, sipas Komisionit, do të jetë Italia, me 1.3% këtë vit dhe 1,1% në 2019-ën, nga 1.5% që ishte një vit më parë. Ndër arsyet për Italinë, ishin pasiguritë mbi politikat ekonomike të Qeverisë së re euroskeptike.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.