KE vlerëson ekonominë shqiptare – Ecuri pozitive gjatë tremujorit të parë, projeksionet nuk ndryshojnë
Komisioni Europian ka mbajtur të pandryshuara projeksionet për ekonominë shqiptare gjatë këtij viti dhe atij të ardhshëm, në 3.8% dhe 4.2% rritje respektivisht.
Në raportin e fundit për vendet kandidate dhe ato potencialisht kandidate, Brukseli nënvizon faktin se, ekonomia shqiptare do të jetë këtë vit dhe atë të ardhshëm, ajo me rritjen më të shpejtë në rajon.
Komisioni Europian ka qenë ndër vite institucioni më optimist në drejtim të projeksioneve makroekonomike, madje edhe më optimist se vetë qeveria shqiptare.
Sa i përket zhvillimeve të brendshme të ekonomisë shqiptare, Brukseli shkruan se, borxhi publik pritet të bjerë në 63.5% brenda 2020.
Institucioni vlerëson gjithashtu me tone mjaft pozitive ecurinë e ekonomisë shqiptare gjatë tremujorit të parë të këtij viti si dhe faktin që Komisioni vetë ka propozuar çeljen e negociatave për anëtarësim në union.
Tregu i punës vlerësohet si një ndër sektorët në progres të ndjeshëm, paçka se papunësia e të rinjve vijon të jetë ende mjaft e lartë. Edhe zhvillimet e fundit në sektorin fiskal marrin vlerësime mjaft pozitive.
Sa i përket sektorit bankar ndërkohë, Komisioni Europian thotë se është, i mirëkapitalizuar.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.