KE “zbulon” si ndihen shqiptarët – Eurobarometri, jemi më të goditurit nga kriza, por edhe më optimistët në Europë
Pjesa dërrmuese e shqiptarëve e mendojnë si mjaft të keqe situatën në të cilën ndodhet ekonomia e vendit apo ajo familjare. Komisioni Europian ka publikuar eurobarometrin më të fundit, i cili ka grumbulluar të dhëna deri në muajin gusht të këtij viti. Sipas studimit të kryer në formën e një anketë rezulton se, 71% e shqiptarëve e mendojnë si mjaft të keqe situatën e ekonomisë shqiptare, ndërsa 66% e tyre e mendojnë si mjaft të keqe gjendjen e financave të tyre personale. Të dyja këto norma janë mbi 10 pikë përqindje më të larta se në eurobaroemtrin e fundit, atë të vjeshtës së vitit të kaluar. Këto norma janë gjithashtu ndjeshëm më të larta se mesatarja e bashkimit europian, madje më të larta se në çdo vend tjetër të kontinentit të vjetër.
Por, ajo që bie tjetër në sy nga të dhënat e anketës, është fakti se, shqiptarët kanë normën më të lartë të optimzimit në Europë, sa i përket pritshmërive për 12 muajt e ardhshëm. 48% e të anketuarve deklarojnë se presin që situate të jetë më e mirë gjatë 12 muajve në vijim. Madje, kjo normë është tre pikë përqindje më e lartë se një vit më parë. Mestarja e BE-së fiksohet në vetëm 20%. Në anketë, shqiptarët radhisin edhe problemet e tyre kryesore të momentit.
Edhe sa i përket pritshmërive të 12 muajve të ardhshëm për situatën e financave personale, shqiptarët kanë normën më të lartë në Europë të pritshmërive pozitive, në 44%. Sa i përket problemeve kryesore me të cilat përballen shqiptarët sot, shëndeti radhitet i pari, me 33%, ndjekur nga rritja e çmimeve me 28% dhe nga kushtet e jetesës me 24%. Në Bashkimin Europian ndërkohë, tre sfidat kryesore, sipas rëndësisë janë: inflacioni, shëndeti dhe situata ekonomike.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.