Kemi kontrata 300 mln euro investime, Gjiknuri: Rruga e re Elbasan – Tiranë do të përfundojë në 2018-ën
‘Vitin e ardhshëm do të përfundojë rruga e re Elbasan – Tiranë, e cila do ta lidhë me autostradën Tiranë-Durrës”, deklaroi ministri i Transporteve dhe Energjisë Damian Gjiknuri në Komisionin e Ekonomisë, ku po prezanton buxhetin e infrastrukturës për vitin 2018. Në vitin e ardhshëm pritet të përfundojnë edhe projektet e tjera të nisura, përfshirë edhe rrugën e Kombit.
“Synimi i qeverisë është të mbyllë ato punë të hapura por njëkohësisht të hapë rrugë të reja. Me këtë dua të them që investimet do të përqendrohen në kompletimin e tjetër të unazës duke bërë lidhjen e rrugës së re të Elbasan-Tiranë që do të përfundojë vitin tjetër, me pjesën e autostradës Tiranë-Durrës në mënyrë që të kemi një trafik shumë më të pranueshëm. Të eliminojmë atë koncesion që krijohet në pjesën e mbetur të unazës dhe mos kemi më probleme. Duam të hapim edhe projektin e ri që ka të bëjë me by -passin e Tepelenës, kjo është pjesë e rrjetit kombëtar sepse përfundimisht përmirëson dhe kompleton aksin nga Levani deri në Kakavijë dhe pjesën tjetër që vazhdon deri në Sarandë. Do të vazhdojmë lotin e dytë të rrugës Korçë-Ersekë, i cili është një lot i rëndësishëm dhe që përfundimisht e lidh bashkinë në fjalë me rrjetin modern rrugor. Do të përfundojnë të gjitha ato projekte të nisura përfshirë edhe rrugën e Kombit e cila duhet thënë se është një rrugë që akoma nuk ka përfunduar”.
Gjiknuri tha se investimet do të vazhdojnë, dhe se TAP dhe Devolli nuk janë të vetmet investime.
“Ka një shqetësim të vazhdueshëm se çfarë do të ndodhë me ciklin e investimeve në momentin kyur TAP-i dhe Devolli të mbarojnë, po ju them që sot që flasim në kemi kontrata të lidhura të reja për gati 300 mln euro të tjera investime. Këtu përfshihet HEC-i i Kalivaçit, i Poçemit që të dyja bashkë kanë një stok prej 200 mln dollarë investime dhe janë mbi 100 mln dollarë investime ku është HEC-i i Shalës dhe disa HEC-e të tjera që kanë kontraktuar kohet e fundit, të cilët do të shërbejnë si një balancë e mirë për të mos u ulur nga ai ritëm”.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.