Kërcënimi kinez për gazin e SHBA – Nëse vendosen tarifat, priten ndryshime në tregun global të energjisë
Kërcënimi kinez për tarifa të reja ndaj 60 miliardë dollarë mallra të importit nga SHBA, do të krijojë ndryshime në tregun e energjisë, ndërkohë që gazi i lëngshëm natyror përfshihet në listën e mallrave.
Lëvizja për të përfshirë gazin amerikan, ka ngritur dyshime ndërkohë që Kina është përmbajtur në të shkuarën për të tarifuar karburantin. Kjo vjen ndërkohë që vendi përpiqet të pastrojë ndotjen e ajrit, gjë që ka ndjesi politike.
Megjithatë, gjërat kanë ndryshuar, ndërkohë që tensionet tregtare me SHBA kanë marrë vrull në javët e fundit. Amerika është prodhuesi kryesor në botë i gazit natyror dhe një eksportues gjigant.
Nëse tarifat për gazin natyror të lëngshëm zbatohen, analistët thonë se do të godisnin rëndë industrinë e gazit në SHBA si dhe axhendën mbi energjinë të Donald Trump. Kina ishte importuesi i dytë më i madh në botë i gazit natyror vitin e kaluar dhe pritet të zërë vendin e parë në 2019-ën, sipas projeksioneve të Agjencisë Ndërkombëtare të Energjisë.
Në vitin 2017, thuajse 15% e eksporteve të gazit natyror të lëngshëm nga SHBA, shkuan në Kinë. Megjithatë, disa analistë thonë se eksportet gjigante të gazit amerikan nuk mund të ndalohen.
Aktualisht, pjesa më e madhe e eksporteve të gazit natyror janë të siguruara nëpërmjet kontratave afat-gjatë, kështu që ndikimi do të jetë i limituar deri sa marrëveshjet të skadojnë.
Megjithatë, tregu spot i gazit natyror, që është rritur në mënyrë të qëndrueshme, pritet të pësojë goditje. Negociatat për kontrata pritet të ndikohen gjithashtu.
Sipas analistëve, lojëtarë gjigant të gazit si Shell dhe Total, do të pësojnë goditjen më të madhe për shkak se blejnë dërgesat e SHBA dhe i shesin në tregje të tjera ku kërkesa dhe çmimet janë më konkurruese.
Kina pritet të gjejë burime alternative me furnizues të tjerë gjigant të gazit si Australia dhe Katari, vende që pritet të përfitojnë në afat-gjatë nga këto tensione.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.