Kërcënon vajza e Soleimanit – “Ditë të zeza për SHBA”. Irani do të tërhiqet nga pakti bërthamor
Qindra mijëra iranianë kanë mbushur rrugët e Teheranit në nisje të Javës, duke marrë pjesë në funeralin e komandantit Kasem Solemiani, që u vra nga sulmi ajror i Shteteve të Bashkuara. Vajza e komandantit tha se vdekja e tij do të sjellë “ditë të zeza” për Shtetet e Bashkuara. “Mos mendo se çdo gjë ka marrë fund me vrasjen e babait tim”, tha Zeinab Soleimani për Donald Trump.
Presidenti i Shteteve të Bashkuara urdhëroi sulmin që vrau gjeneralin, i cili ka drejtuar ambicien e Iranit për të rritur influencën në rajon. Në kundërpërgjigje të kërcënimeve të Iranit, Trump tha se ka shënjestruar 52 pika strategjike iraniane, përfshirë qendra kulturore, nëse Teherani sulmon amerikanët. Duke shtuar tensionet, Irani deklaroi se do braktisë angazhimet në marrëveshjen bërthamore të vitit 2015.
Shtetet e Bashkuara, pasi u tërhoqën nga marrëveshja në vitin 2018, kanë vendosur sanksione ndaj Iranit dhe kanë penguar eksportet e naftës së vendit, që janë burimi bazë i të ardhurave për Qeverinë. Autoritetet në Irak kanë kërkuar largimin e trupave amerikane nga vendi. Trump u kundërpërgjigj duke kërcënuar sanksione ndaj Irakut dhe tha se Bagdadi duhet t’i paguaj Washingtonit koston e një bazë ajrore shumë të shtrenjtë që ndodhet atje.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.