Kërkesa për furnizim me ujë – UKT, tender 40 mln lekë për shtimin e impiantit të Bovillës
Në këto ditë të nxehta vere ku temperaturat kanë dhënë efektin e tyre edhe në thatësirë, qytetarët janë përballur me kufizime të furnizimit me ujë. Në zonat ku problematika ka qenë më e madhe, Bashkia ka marrë masa duke shpërndarë ujë me bote.
Pikërisht në këtë moment ka ardhur edhe propozimi i bashkisë për rritjen e çmimit të ujit të pijshëm, rritje kjo që do të ndikojë ndjeshëm në rritjen e të ardhurave të ujësjellësit, i cili ka si qëllim që brenda pesë viteve të ardhshme të furnizojë me ujë 24 orë çdo abonent. Pas marrjes së votave pro nga këshilltarët bashkiak për rritjen e çmimit të ujit as ujësjellës Kanalizime në Tiranë nuk është se po rri në pritje.
Ky institucion ka hapur procedurat e prokurimit publik për shërbim konsulence në vlerën e 40 milionë lekëve pa TVSH. Objekti i prokurimit është “Studim dhe projektim i objektit: “Shtesë e Impiantit të Përpunimit të ujit Bovillë nga 1800 l/sek në 3600 l/sek në fazën e parë të zbatimit për 600 l/sek “. Ky projekt do të financohet nga të ardhurat e UKT dhe afati i ofrimit të shërbimit është 70 ditë nga momenti i nënshkrimit të kontratës. Subjekti që do të shpallet fitues duhet që të kryejë: Dyfishimin e kapacitetit të impiantit Bovillë nga 1800 l/sek në 3600 l/sek.
Uji i trajtuar duhet të jetë në përputhje me cilësinë e rregullores që është për ujin e pijshëm. Ky projekt do të realizohet me faza, faza e parë e ndërtimit do të përmbledhë shtesën e trajtimit të ujit me kapacitet 600 l/sek ( gjithsej me 2400 l/sek). Sipas specifikimeve të kontratës, shtesa e impiantit do të jetë në vazhdim të territorit ku shtrihet Impianti ekzistues. Me ndërtimin e shtesës së Impiantit Bovillë nuk do të parashikohen ndërtime zyrash, laboratorësh dhe ambientesh të tjera. Fituesi i tenderit prite që të shpallet më 9 gusht.
Nëse ju referohemi burimeve që furnizojnë Tiranën me ujë ato janë: Selita, Shën Mëria dhe Bovilla burime me vetërrjedhje ndërsa burime me stacion pompimi janë, Bërxull, Laknas, Buka, Pema, Cokollata dhe Pishina. Nga këto burime në periudhën e thatë prodhohen në total 3180 l/sek (Stacionet e Pompimit prodhojnë 530 l/s ) ndërsa nevojat për ujë për qytetin e Tiranës dhe te Kamzës janë 3450 l/sek.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.