Kërkesat e bizneseve për “rigjenerim” – Nga këstet e tatim-fitimit, tek dividenti dhe shtyrja e pagesave të qirave
Bizneset kërkojnë nga qeveria që të ndërmarrë një sërë masash për rigjenerimin e ekonomisë pas pasojave të shkaktuara nga COVID-19. Kërkesat janë adresuar në anketën e zhvilluar nga Sekretariati i Këshillit të Investimeve dhe janë të ndara sipas nevojave të sektorëve. Konkretisht, sektori i turizmit i cili rezulton dhe më i prekuri sugjeron që bizneset të mos paguajnë tatim- fitim për vitin 2019 në mënyrë që të kenë disa rezerva për të mbajtur kompanitë në këmbë për 2020-2021 si dhe të reduktohet norma e tatim fitimit me 5-10% për vitin 2020-2021.
Kërkohet gjithashtu përjashtimi i taksës hyrëse për të gjithë turistët e huaj; rishikim i tarifave aeroportuale. Mos aplikimi i gjobave dhe kamatvonesave për mos likuidimin në kohë të kontributeve të sigurimeve shoqërore, tatim mbi burim, tatim fitim, etj. Sektori i tregtisë sugjeron që këstet e tatim fitimit për biznesin e mesëm dhe të madh të paguhen çdo 3 muaj në bazë të të ardhurave reale; të shtyhen me 6 muaj pagesa e qirave të lokaleve të marra me qira nga biznese që kanë reduktim të xhiros mbi 50% ose janë mbyllur fare dhe të hiqet tatimi në burim për këto pagesa.
Ulje të nivelit të TVSH në 10% dhe ulje të tatimit mbi të ardhurat. Sektori i shërbimeve sugjeron liberalizimin e tarifave mbi qiratë si dhe marrjen e masave për mbrojtjen e prodhimit vendas. Industria sugjeron pezullim të pagesave të kontributeve të sigurimeve shoqërore dhe shëndetësore të paktën deri në fund të vitit 2020; Ulje në 5% të Tatimit mbi Dividentin për vitin 2020 si dhe zerimin e përqindjes së tatimit mbi dividentin.
Sektori i ndërtimit kërkon shtyrja e kësteve të tatim-fitimit në 6 mujorin e dytë të vitit 2020, ndërsa bujqësia kërkon anulimin e ligjit për TVSH-në e inputeve bujqësore dhe rimbursim e fermerit sipas faturës si dhe heqjen e akcizës për prodhuesit vendas për një periudhe 1 vjeçare.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.