Kërkesat për azil në nivele ‘të frikshme’ – Franca planifikon ligje më të ashpra

Kërkesat për azil në Francë arritën një shifër rekord prej 100 000 gjatë vitit të kaluar. Sipas zyrtarëve të lartë, shkalla e aplikimeve ishte ‘historike’, me shqiptarët që formonin grupin më të madh të aplikantëve, pavarësisht se vendi ynë është cilësuar nga Franca si vend i sigurt origjine.

Ndërkohë, qeveria e Macron po përgatitet për hartimin e një projekt – ligji mbi emigracionin në muajin e ardhshëm, por partia e tij është ndarë për mënyrën se si do të trajtohet çështja.

Macron dhe kryeministri Edouard Philippe janë zotuar të shpejtojnë procesin për menaxhimin e kërkesave për azil si dhe për ofrimin e kushteve të përmirësuara për aplikantët e suksesshëm.

Por, ata gjithashtu premtuan se do të ndjekin një linjë shumë të ashpër për emigrantët ekonomikë në rast se do të ketë rritje të numrit të tyre, ndjekur nga kontrolle shumë të rrepta.

Ndërkohë, në mesazhin e Vitit të Ri, Macron tha se Franca nuk mund t’i mirëpresë të gjithë, duke premtuar një politikë emigracioni që ndjek një linjë midis ‘njerëzimit dhe efikasitetit.’

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.