Kërkesë e madhe për energji elektrike / IEA: Do të kërkojë gjenerim nga lëndët fosile duke rritur ndotjen
Kërkesa botërore për energji elektrike po rritet më shpejtë se ç’mund të ofrojë kapaciteti i energjisë së rinovueshme, dhe mund të kërkojë më shumë energji të gjeneruar nga djegia e lëndëve fosile, sipas Agjencisë Ndërkombëtare të Energjisë. Pasi ra me mbi 1% në vitin 2020, kur pandemia e Covid frenoi aktivitetin industrial në botë, konsumi i energjisë pritet të rritet me 5% në vitin 2021 dhe me 4% në vitin 2022, ndërkohë që ekonomia po rimëkëmbet, sipas raportit mbi tregun e energjisë elektrike të Agjencisë. Thuajse gjysma e kësaj rritjeje do të përmbushet nga djegia e lëndëve fosile, kryesisht qymyri, çka do të rrisë emetimet e dioksidit të karbonit nga sektori në nivele rekord në vitin 2022, sipas agjencisë. Kërkesa do të jetë veçanërisht e fortë në rajonin e Azisë së Paqësorit, përfshirë Kinën dhe Indinë.
Burimet e rinovueshme po rriten shpejtë, ndërkohë që komuniteti botëror trajton nevojën e uljes së ndotjes, por raporti tregon se procesi do të duhet të përshpejtohet, për shkak se energjia e pastër duhet t’i bëjë ballë rritjes së kërkesës. Kapaciteti i energjisë së rinovueshme, përfshirë energjinë hidrike, diellore dhe të erës, pritet të tregojnë një rritje me 8% në vitin 2021, dhe mbi 6% në vitin e ardhshëm. “Pavarësisht kësaj rritjeje të fortë, energjia e rinovueshme do përmbushë rreth gjysmën e rritjes së projektuar në kërkesë për këto dy vite”- deklaroi agjencia, duke bërë thirrje për investime në teknologji të pastërta.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.