Kërkime të reja për krom – Investimi në Bulqizë, pas më shumë se 7 vite mungese të kërkimeve të reja
Ministria e Infrastrukturës dhe Energjisë ka dhënë një leje të re për kërkim-zbulimin e mineralit të kromit në zonën e Bulqizës, duke i hapur rrugë investimeev të reja në këtë drejtim. Dhënia e kësaj leje ka rëndësi të veçantë, pasi vetë autortietet kanë pranuar se prej më shumë se 7 vitesh në vendin tonë nuk kryhen operacione të reja për zbulime të reja të këtij minerali. Ndërsa paralelisht në vitin 2018 u dha alarmi se rezervat e njohura të kromit pritet të mbarojnë brenda 8 vitesh, ndërsa industria e ferrokromit në vendin tonë do të duhej të mbyllej pas 10 viteve.
Leja e re është dhënë në zonën e Bulqizës, për objektin shkolla Zabeli. Ndërkohë që kjo është leja e dytë që jepet brenda këtij viti, pas asaj të dhënë në muajin gusht në zonën minerare të Lufaj në Mirditë. Dhënia e këtyre lejeve bazohet në planin 3-vjeçar të 2019-2021 të sektorit minerar, i cili ndër të tjera parashikon zhvillimin e aktivitetetit të kërkim-zbulimit në 132 zona minerare, kryesisht për mineralin e kromit, por edhe të bakrit apo arit.
Ndërkaq, Ministria e Infstratukturës dhe Energjisë synon të bëjë disa ndryshime edhe në ligjin “Për sektorin minerar”, me qëllim stimulimin e investimeve. Sipas ndryshimeve të propozuara, detyrimi për depozimtimin e garancisë financiare të investimit për lejet e kërkim zbulimit do ulet në masën 10%. Aktualisht kjo vlerë është e barabartë me vlerën e investimit që është parashikuar të kryejë shoqëria çdo vit, por shoqëritë minerare e konsiderojnë si një barrë shumë të rëndë financiare, pasi bllokon një pjesës të likujditeteve të shoqërisë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.