Kërkimi i naftës – Rama: Interes i shtuar nga kompanitë e mëdha, diskutime për futjen e tyre në Shqipëri
Kompanitë të mëdha të naftës kanë shfaqur interesin për të investuar në Shqipëri në fushën e kërkimit dhe zbulimit të naftës. Deklarata ka ardhur nga kryeministri, Edi Rama, gjatë inspektimit në stacionin e kompresorëve të gazit në Fier, vepër e projektit të gazjellësit TAP.
Sipas tij, qeveria ka nisur diskutime interesi për të vlerësuar futjen e këtyre kompanive të mëdha në Shqipëri.
“Cilësia me të cilën po zhvillohet puna që po kryhet në Shqipëri kanë krijuar një interes të shtuar për kompanitë e mëdha. Këtu nuk kam parasysh SHELL, por edhe kompani të tjera të mëdha ne kemi nisur diskutime interesi për të vlerësuar futjen e tyre në Shqipëri. Një zinxhir i tërë zbulimesh dhe zhvillimi në fushën e eksplorimit të naftës mund të jetë para nesh”, u shpreh Rama.
Ndërkohë, duke u ndalur te stacioni i kompresorëve të gazit, i cili pritet të fillojë operimin në vitin 2020, Rama tha se projekti nuk ka shënuar asnjë vonesë dhe se është përfunduar brenda afatit të përcaktuar. Po ashtu, shtoi se projekti ka punësuar mbi 250 persona, ku 70% e fuqisë punëtore janë vendase.
“Ky stacion, që do të jetë gati për të filluar operimin tregtar në vitin 2020, pritet të arrijë gjatë këtij viti në më shumë se 250 punonjës, ndërkohë që janë mbi 100 vende të tjera pune që janë gjeneruar për kompanitë që bashkëpunojnë me projektin në Fier, në Tiranë, në Elbasan dhe në Korçë dhe që janë të domosdoshme për ecurinë e projektit. Vlen për t’u theksuar se mbi 70% e fuqisë punëtore është vendase. Janë vende të reja pune që janë krijuar dhe janë plotësuar nga punonjës vendas, duke pasur një ndikim patjetër ekonomik, por duke ndikuar edhe në rritjen e kapaciteteve. Të gjithë ata që janë përfshirë në këtë operacion, siç dëshmojnë edhe vetë kompanitë shqiptare që kanë bashkëpunuar dhe bashkëpunojnë për ndërtimin e kësaj infrastrukture të pazakonshme, rriten kapacitetet profesionale dhe teknike dhe kompanitë përfitojnë një vlerë të shtuar nga kjo pikëpamje, ku dihet botërisht që ne kemi një nevojë vazhdimisht urgjente.”
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.