Kërkoi të vinte një mur ndarës mes tyre – Por përse kaq shumë latinë kanë votuar për Trump?!
Pavarësisht disfatës ndaj Joe Biden, Donald Trump dhe Partia Republikane e SHBA morën më shumë vota nga elektorati i Amerikës Latine sesa në vitin 2016. Sipas CNN, përqindja votave të tyre për Trump në krahasim me fushatën e tij fituese katër vjet më parë shkoi nga 28% në 32%. Një rritje e vogël, por që ka tërhequr shumë vëmendjen e mediave dhe analistëve amerikanë të cilët prisnin masivisht se ky grup do të votonte epërsisht për Demokratët. Pas këtij lajmi ka, siç thuhet, një botë: që flet spanjisht, që jeton në Shtetet e Bashkuara dhe që nuk mund të vendoset lehtë në një kategori të vetme.
Hispanikët (sot ata që janë politikisht korrekt mbase do të dëshirojnë që përdorimi i emërtimit gjithëpërfshirës Latinx të përcaktojë të gjithë) janë rreth 60 milion në SHBA. Prej tyre, 32 milion patën mundësinë të votojnë më 3 nëntor 2020 dhe, një detaj për të mos u harruar, shumica zgjodhën Biden. Por që në disa rrethe, duke përfshirë atë të Floridës ku ka një komunitet të madh Kuban, fitorja e Trump nuk shihet mirë nga demokratë si Alexandria Ocasio-Cortez, e cila e ka bërë prejardhjen e saj Porto Riko një pikë forcë.
“Unë nuk e di pse dikush në këtë parti ende mban shpresën se Kubanët konservatorë do të votojnë për Demokratët,” tha Ocasio-Cortez në një intervistë me Politico, duke sulmuar ashpër partinë e saj. Kongresistja u bashkua me korin e kritikave ndaj Demokratëve, fajtor për marrjen e votës së Latinëve për të mirëqenë, ndërsa rivalët konservatorë bënë më shumë përpjekje për komunitetet spanjisht-folëse. Komiteti ‘Latinët për Trump’ ka punuar shumë gjatë muajve të fundit për të sjellë në anën e tyre votuesit me origjinë nga Amerika Qendrore dhe Jugore. Dhe në sajë të tubimeve, takimeve dhe mesazheve informuese ai pati sukses në qëllimin e tij.
Për më tepër, Trump ka arritur qëllimin për t’i tërhequr drejt vetes duke vazhduar të krahasojë demokratët me socialistët, duke zgjuar kështu frikë të rrënjosur thellë për ata me origjinë Kubane ose Venezueliane dhe të cilët nuk duan të dëgjojnë për socializmin as edhe nga distanca: është ende ideologjia që i ka çuar ata të largohen nga vendet e tyre të origjinës. Disa ekspertë shkojnë aq larg sa të thonë se ‘makizmi’ i Trump ka bërë rrugën e tij midis Latinëve, edhe pse ish-presidenti i ka ofenduar meksikanët dhe qytetarë të tjerë hispanik disa herë. Me terma të tilla si “kriminelë dhe përdhunues” që ai përdori gjatë tubimit famëkeq parazgjedhor të vitit 2016 në të cilin u mburr me projektin për murin në kufirin me Meksikën.
Së fundmi, besimi i përbashkët i krishterë dhe kundërshtimi i abortit mund të kenë sjellë më afër votuesit e Amerikës Latine të besojnë ende tek ish-presidenti. Përgjigja më e qartë për këtë ndryshim të papritur politik vjen direkt nga ata që janë të interesuar: “Disa Latinë votojnë Republikanë, dhe ju duhet ta pranoni këtë fakt si të mirëqenë”, shpjegon një artikull nga gazetari amerikano-latin, Isvett Verde i New York Times. “Amerikano-Latinët nuk janë një grup uniform votash” thjeshton me shkurtësi dhe mençuri një artikull të Atlantikut nga Geraldo L. Cadava. Ajo që është e sigurt është se pakica e Amerikës Latine në SH.B.A. më në fund po e bën veten të dëgjohet, me votën dhe falë debatit të krijuar mbi zgjedhjet për vendet në senat. (Wired)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.