Këshilli miraton 18 vendime – Shtyhet ndërtimi i kullës në funksion të Bashkisë
Në një kohë që banorët e Unazës së re protestonin përpara Bashkisë, Këshilli Bashkiak i Tiranës ka zhvilluar mbledhjen e radhës në kushte jo të favorshme, duke kaluar në një hark kohor prej 30 minutash, 22 projektvendime të rendit të ditës, ku vetëm 4 prej tyre nuk u miratuan për shkak se kërkonin 3/5 e votave dhe opozita nuk ishte prezente.
Në mungesë të Kryetarit të Bashkisë, Erion Veliaj, në mbledhje ka qenë i pranishëm nënkryetari, Andi Seferi dhe e vetmja pikë që pati diskutime ishte ajo që lidhej me miratimin e marrëveshjes paraprake midis Bashkisë së Tiranës dhe subjektit “Alis-ndërtim” sh.p.k, për ndërtimin e një godine disa katëshe në funksion dhe favor të bashkisë së Tiranës, i cili është rikthyer për rishqyrtim.
Pikat e tjera që nuk u miratuan kishin të bënin me dhënien me qira të disa sipërfaqeve në pronë të Bashkisë Tiranë, ndërsa u miratua programi afatmesëm buxhetor, një rregullore për zënien e hapësirave publike, rregullorja e re e Këshillit Bashkiak si dhe ndryshime sa i përket transportit urban.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.