Këstet e paradhënies së tatim fitimit – DPT: Ka nisur rishikimi për periudhën nëntor-dhjetor
Drejtoria e përgjithshme e Tatimeve njofton të gjithë tatimpaguesit që po rishikon këstet e paradhënies së tatim fitimit për periudhën nëntor-dhjetor 2018.
“Administrata Tatimore bazuar në nenin 30, “Parapagimet”, pika 5 e ligjit nr. 8438, dt. 28.12.1998 “Për tatimin mbi të ardhurat”, i ndryshuar dhe kapitullit 3.13. “Parapagimet (Paradhëniet)”, pika 3.13.4 “Korrigjimi në rritje i kësteve mujore të paradhënieve të tatimit mbi fitimin”, germa c, informon tatimpaguesit se është duke rishikuar këstet e paradhënieve të Tatim Fitimit për periudhën nëntor – dhjetor 2018″, thuhet në njofitmin e DPT-së.
Sipas Administratës Tatimore, procesi i rishikimit po kryhet duke u bazuar në të dhënat e aktivitetit ekonomik që tatimpaguesi ka deklaruar përmes deklaratave të TVSH-së. Sipas njoftimit, DPT merr në konsideratë edhe të dhëna nga palë të treta, të cilat nuk janë deklaruar nga ana e tatimpaguesit.
Përmes këtij procesi synohet të arrihet një performancë e kënaqshme ekonomike dhe fiskale e tatimpaguesve. Po ashtu, ai kryhet edhe për të ndihmuar tatimpaguesit për të balancuar pagesat e Tatim Fitimit në përfundim të mbylljes së pasqyrave financiare vjetore, si dhe për të mos u krijuar probleme likuiditeti.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.