KFW shtyn deri me 30 qershor afatin e disbursimeve për “Unazën e Jugut”, qeveria shqiptare kishte kërkuar datën 28 shkurt

Qeveria shqiptare dhe Banka gjermane KFW kanë arritur dakordësi për shtyrjen e afatit të disbursimeve për tre marrëveshjet e kredisë kreditë e financimit të unazës energjetike të Jugut.

Qeveria shqiptare kishte kërkuar që shtyrja të bëhej deri në fund të muajit shkurt megjithatë, banka gjermane ka zgjedhur që afatin e disbursimit të shtyjë edhe më tej, deri me 30 qershor.Ky fakt evidentohet në relacionet e tre marrëveshjeve të kredisë që janë depozituar në Kuvend për miratim.

Projektligjet e depozituara në Kuvend ndryshojnë në thelb tre marrëveshjet e kredisë në vlerë përkatësisht 10 milion e 750 mijë euro, 500 mijë euro e 37 milion e 750 mijë euro për projektin “Linja unazore 110 kilovolt e Shqipërisë së Jugut”.

Projekti “Linja unazore 110 kilovolt e Shqipërisë së Jugut” është një projekt që financohet nga qeveria e Republikës Federale Gjermane nëpërmjet Bankës KfW Frankfurt am Main, nëpërmjet marrëveshjeve të huave, në vlerën totale prej 49 milionë eurosh.

Objektivi i projektit është përmirësimi i furnizimit sasior dhe cilësor me energji elektrike në Shqipërinë e Jugut dhe reduktimi të dëmtimit global dhe lokal i ambientit. Kjo kontribuon në forcimin e një zhvillimi të qëndrueshëm në Shqipërinë e Jugut dhe për mbrojtjen klimaterike.

Ku ndryshoi projekti dhe pse kwrkohet shtyrje e afatit tw disbursimit?

Plani i projektit është bazuar në studimet e parafizibilitetit “Projekti i transmetimit të energjisë në JugLindje”, dhe “Projekti i transmetimit dhe shpërndarjes së energjisë në JugPerëndim”nga marsi i vitit 2006 dhe mbi marrëveshjet e lidhura ndërmjet KfW-së, huamarrësit dhe agjencisë së zbatimit të projektit.

Aktivitetet e mëposhtme të projektit ishin parashikuar fillimisht të financohen nga huaja: Një linjë e re 110 kV nga Babica në Sarandë, fuqizimi i nënstacioneve në Babicë dhe Sarandë, lidhjet 110 kV të Orikumit dhe Himarës me linjën e sapo ndërtuar 110 kV, rikonfigurimi i dy rrjeteve të shpërndarjes, linja e re 110 kV nga Erseka-Përmet, Korçë-Ersekë dhe Përmet-Këlcyrë-Memaliaj; shtrirjen e nënstacioneve në Përmet, Ersekë, Korçë, Këlcyrë dhe Memaliaj, fuqizimin e nënstacionit të Zëmblakut dhe ndërtimin e një linje 110 kV nga Zemblak-Korçë.

Gjatë vitit 2011 u bë i nevojshëm rishikimi i projektit të mësipërm, si rezultat i privatizimit të një pjese të sektorit energjetik dhe konkretisht atij të rrjetit të shpërndarjes. Në këto kushte, u kërkua reduktimi i aktiviteteve të projektit, duke hequr nga qëllimi i punimeve nënstacionet e Orikumit dhe Himarës.

Fondet e mbetura, me dakordësinë e gjithë palëve u vendos të përdoren për fuqizimin e mëtejshëm të linjave të transmetimit 110 kV të Shqipërisë së Jugut.

Me kalimin në administrim të shtetit të operatorit të shpërndarjes, si dhe në mbështetje të urdhrit nr.255, datë 21.7.2014, të ministrit të Energjisë dhe Industrisë, “Për marrjen e masave për financimin dhe ndërtimin e nënstacioneve 110/TM kV në Orikum dhe në Himarë”, është ngarkuar dhe autorizuar OST, sh.a-ja, për ndjekjen e procedurave me qëllim përfshirjen në projekt të aktiviteteve për ndërtimin e nënstacioneve 110/TM kV në Orikum dhe Himarë.

Fondet e mbetura pa u përdorur nga kreditë e akorduara nga KfW-ja vlerësohen të jenë të mjaftueshme për realizimin e këtyre aktiviteteve. Koha e parashikuar për implementimin e aktiviteteve të përfshira rishtas në projekt është 14 muaj nga data efektive e kontratës.

Duke qenë se ky projekt ka përfitues përfundimtar OSHEE, sh.a-në, për finalizimin me sukses të këtij projekti dhe konkretisht për marrjen në dorëzim dhe kryerjen e pagesave përfundimtare, do të nevojitet kohë shtesë, përtej afatit të implementimit 14 muaj.

Si rrjedhim, nga pala shqiptare u kërkua shtyrja e afatit të disbursimeve pranë KfW-së, deri më datë 28.2.2018. KfW-ja, nëpërmjet dokumenteve përkatëse ndryshuese të marrëveshjeve, ka aprovuar shtyrjen e afatit të disbursimeve me rreth 4 muaj përtej kërkesës së palës shqiptare, shtyrje kjo e cila u konsiderua e arsyeshme dhe siguron që nuk do të ketë shtyrje të mëtejshme.

Dokumenti ndryshues, u miratua, në parim, nga Këshilli i Ministrave nëpërmjet vendimit të datës 9 nëntor 2016.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.