Kina, asnjë rast të ri me Covid-19/ Politika “zero tolerancë” ndaj koronavirusit rezulton e suksesshme
Autoritetet shëndetësore në Kina raportuan të hënën se nuk kishte raste të reja me Covid-19 në vend, për herë të parë që nga korriku. Të dhënat sugjerojnë se shpërthimet e vatrave të fundit të infektimeve mund të jenë vënë nën kontroll. Rastet e reja u zbuluan në 20 korrik, mes punonjësve të aeroportit të Nanjing, ku u konfirmua se ishin infektuar me variantin Delta, fillimisht të zbuluar në Indi.
Që nga ajo kohë, më shumë se 1,200 persona në Kinë janë konfirmuar pozitivë, megjithëse jo të gjithë me variantin Delta. Infektimet e reja detyruan autoritetet lokale në Kinë, që të vendosin masa të ashpra kufizuese dhe testimin e miliona njerëzve, për të izoluar dhe trajtuar infektimin. Sipas autoriteteve, asnjë person nuk humbi jetën nga shpërthimet e fundit të infektimeve. Në të gjithë Kinën, ndërkohë, rastet e reja ranë në numra 1-shifrorë javën e kaluar, pasi arritën kulmin në gusht.
Por, gjatë fundjavës, Shanghai vendosi me qindra njerëz në karantinë, pasi disa infektime të reja u evidentuan mes punonjësve në dy aeroportet e qytetit. Kina ka ndërmarrë një qasje “zero tolerancë” ndaj koronavirusit, por që ka pasur dëme ekonomike dhe sociale në vendin me popullsinë më të madhe në botë. Numri i fluturimeve të brendshme ra me 19.4% gjatë gushtit, krahasuar me një vitë më parë, pasi vatrat e reja detyaruan autoritetet të vendosin kufizime.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.