Kina do të ulë tarifat tregtare – Synon të rrisë importet e disa produkteve, përfshirë mishin e derrit!
Kina do të ulë tarifat ndaj produkteve si mishi i derrit, avokado dhe disa lloje të procesorëve në vitin e ardhshëm, ndërkohë që Pekini po synon të rrisë importet si pasojë e ngadalësimit ekonomik dhe luftës tregtare me SHBA. Vitin e ardhshëm, Kina do të aplikojë tarifa të përkohshme të importit, që janë më të ulëta se ato aktuale, në mbi 850 produkte, sipas Ministrisë së Financave. Ndryshimi i tarifave u ndërmor për të rritur importet e produkteve që përballen me mungesë në tregun e brendshme, sipas Ministrisë.
Kina dhe SHBA kanë zbutur qasjen në luftën tregtare dhe lajmëruan më herët gjatë muajit një marrëveshje të fazës së parë që do të ulë disa tarifa amerikane, në këmbim të shtimit të blerjeve të produkteve bujqësore amerikane nga Kina. Ministria e Financave bëri të ditur se norma tarifore e mishit të derrit do të ulet në 8% , nga 12%, ndërkohë që Kina po përpiqet të plotësojë mungesën në treg, që erdhi si pasojë e sëmundjeve të derrave. Përhapja e gripit afrikan të derrit që nisi në Gusht të vitit të kaluar, ka përgjysmuar tufat e derrave në Kinë, duke rritur çmimet në nivele rekord. Kina bleu 229,707 ton mish derri në Nëntor, në rritje me 150% nga viti i kaluar.
Kina do të ulë gjithashtu tarifat avokadon në 7%, nga 30% që është aktualisht. Tarifat për disa mjekime të astmës dhe diabetit do të vendosen në zero dhe për disa produkte të drurit dhe letrës do të ulen gjithashtu. Përfaqësuesi i tregtisë në SHBA, Robert Lighthizer, tha se Kina ka rënë dakord të blejë 200 miliardë dollarë mallra amerikan në 2 vitet e ardhshme, nën marrëveshjen tregtare të fazës së parë që do nënshkruhet në Janar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.