Kina i bën lëshim SHBA – Përjashton disa produkte agro-bujqësore nga tarifat doganore

Kina planifikon të përjashtojë disa produkte amerikane nga tarifat doganore. Kjo lëvizje vjen vetëm pak kohë nga fillimi i bisedimeve mes dy ekonomive më të mëdha të botës për tregtinë. Pjesa dërrmuese e produkteve që do të përjashtohen nga tarifat janë agro-bujqësore, mes të cilave figuron edhe soja, një produkt shumë i përdorur në Kinë dhe që me tarifat e kohëve të fundit kishte shkaktuar një mungesë të theksuar në tregun vendas.

Bisedimet për tregtinë mes dy vendeve do të fillojnë muajin e ardhshëm. Lëvizja ndërkohë vjen [pas asaj të presidentit amerikan, i cili shtyu me 2 javë aplikimin e tarifave të reja doganore shtesë për një sërë produktesh. Lajmin për përjashtimin e disa produkteve amerikane nga tarifat e dha vetëm ministri kinez i tregtisë.

Produktet e reja, përfshirë sojën dhe mishin e derrit i shtohen kështu listës prej 16 produktesh të tjera që janë të përjashtuar nga tarifat, deri në 16 shtator të vitit 2020. Vendimi i qeverisë kineze vjen gjithashtu vetëm një ditë pas deklaratës së Trump i cili u shpreh se do ta pranonte një marrëveshje me Kinën paçka se nuk do të ishte plotësisht dakord me të.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.