Kina i thotë BE-së se do të kërkojë paqen në Ukrainë në mënyrën e saj – Çfarë nënkupton kjo!

Kina i ofroi Bashkimit Europian garanci të premten se do të kërkonte paqen në Ukrainë, por tha se kjo do të ishte në kushtet e saj, duke shmangur presionin për një qëndrim më të ashpër ndaj Rusisë. Kryeministri Li Keqiang u tha udhëheqësve të BE-së se Pekini do të nxiste paqen në “mënyrën e vet”, ndërsa presidenti Xi Jinping tha se shpresonte që BE-ja do ta trajtonte Kinën “në mënyrë të pavarur”, në një shenjë për lidhjet e ngushta të Europës me Shtetet e Bashkuara.

BE i tha Pekinit gjatë samitit virtual me Li dhe Xi që të mos lejojë Moskën të anashkalojë sanksionet perëndimore të vendosura për pushtimin e Ukrainës nga Rusia. Kina po krijon lidhje më të ngushta për energjinë, tregtinë dhe sigurinë me Moskën, duke e pozicionuar veten si një forcë globale që mund t’i rezistojë Shteteve të Bashkuara. Disa javë përpara pushtimit të 24 shkurtit, Kina dhe Rusia deklaruan një partneritet strategjik “pa kufij”. Li u tha udhëheqësve të BE-së se Kina gjithmonë ka kërkuar paqe dhe ka promovuar negociatat dhe është e gatshme të vazhdojë të luajë një rol konstruktiv me komunitetin ndërkombëtar, raportoi transmetuesi shtetëror CCTV. CCTV raportoi gjithashtu komentet e Xi mbi një politikë të pavarur të BE-së.

Michel tha se të dy palët ranë dakord se lufta, të cilën Rusia e quan një “operacion special ushtarak”, po kërcënonte sigurinë globale dhe ekonominë globale. Kina ka refuzuar të dënojë veprimin e Rusisë në Ukrainë ose ta quajë atë një pushtim dhe ka kritikuar vazhdimisht ato që i quan sanksione të paligjshme dhe të njëanshme perëndimore. Michel dhe von der Leyen e përshkruan tonin e samitit si “të hapur dhe të sinqertë”, ndërsa von der Leyen tha se tregtia midis dy prej ekonomive më të mëdha në botë ishte shumë më e madhe se lidhjet ekonomike të Kinës me Rusinë.

Më shumë se një e katërta e tregtisë globale të Kinës ishte me bllokun dhe Shtetet e Bashkuara vitin e kaluar, kundrejt vetëm 2.4% me Rusinë, tha një zyrtar i BE-së. Kina ka shqetësime se vendet europiane po marrin sinjale më të ashpra të politikës së jashtme nga Uashingtoni dhe i ka bërë thirrje BE-së që të “përjashtojë ndërhyrjen e jashtme” nga marrëdhëniet e saj me Kinën. Në vitin 2019, BE-ja kaloi papritur nga një gjuhë e butë diplomatike për ta etiketuar Kinën një rivale sistematike.

BE, Britania dhe Shtetet e Bashkuara kanë sanksionuar zyrtarët kinezë lidhur me shkeljet e dyshuara të të drejtave të njeriut në rajonin e Xinjiang, gjë që e shtyu Pekinin të hakmerrej në të njëjtën mënyrë, duke ngrirë një marrëveshje investimi tashmë të negociuar BE-Kinë. Që atëherë Kina ka pezulluar gjithashtu importet nga Lituania pasi shteti baltik i BE-së lejoi Tajvanin të hapte një ambasadë de facto në kryeqytetin e saj, duke zemëruar Pekinin, i cili e konsideron ishullin e sunduar në mënyrë demokratike si territorin e vet. Von der Leyen tha se Pekini duhej të mbronte rendin ndërkombëtar që e ka bërë Kinën ekonominë e dytë më të madhe në botë. Perëndimi thotë se pushtimi rus i Ukrainës është një shkelje e kartës së Kombeve të Bashkuara. RTS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.