Kina ka shpenzuar 279 miliardë dollarë për kërkime dhe zhvillim në 2017

Shpenzimet e përgjithshme të Kinës për kërkime dhe zhvillim vlerësohen të kenë arritur në 1.76 trilionë juanë (279 miliardë dollarë) vitin e kaluar, një rritje vjetore prej 14 për qind, tha të hënën ministri i shkencave të Kinës.

Në një konferencë për mediat ministri  i Shkencës dhe Teknologjisë Wan Gang, tha se investimet lidhen me synimin që deri në vitin 2050 Kina të hyjë në radhët e vendeve inovative dhe të bëhet një fuqi e madhe teknologjike.

Shpenzimet e vitit 2017, llogaritur nga Reuters, arrijnë në rreth 2.1 për qind të totalit të prodhimit të brendshëm bruto të Kinës. Megjithëse shpenzimet vjetore të Kinës për kërkime dhe zhvillim janë rritur me 70.9 për qind nga viti 2012, akoma ka diferencë me vende të tjera të zhvilluara. Kështu, sipas të dhënave të Bankës Botërore për 2015, Shtetet e Bashkuara shpenzojnë  rreth 2.8 për qind, Gjermania  2.9 për qind dhe Japonia 3.3 për qind .

Kina po përpiqet të lehtësojë varësinë e saj nga industritë e rënda dhe të nxisë rritjen ekonomike përmes industrive më pak ndotëse e që janë më miqësore me mjedisin, ndaj dhe  ka krijuar dhjetëra parqe të reja industriale të teknologjisë së lartë dhe inkubatorë që synojnë nxitjen e teknologjive të tilla si inteligjenca artificiale dhe robotikë.

Vendi gjithashtu po investon shumë për të dominuar industri të tilla si energjia bërthamore dhe energjia e ripërtëritshme, trenat me shpejtësi të lartë dhe automjetet elektrike. Gang u tha gazetarëve se deri në vitin 2020 synojnë të dyfishojnë prodhimin e automjeteve elektrike, e kjo të arrijë deri në 2 milionë njësi.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.