Kina, përgjegjëse për më shumë se gjysmën e impianteve të karbonit në ndërtim në të gjithë planetin!

Pavarësisht iniciativave të shumta që Kina po ndërmerr për të prodhuar energji nga burime të rinovueshme, vendi është përgjegjës për më shumë se gjysmën e impianteve të qymyrit në ndërtim në të gjithë planetin. Gjatë Konferencës së fundit të Palëve për Klimën, COP26, pothuajse 200 vende kishin “premtuar” uljen e përdorimit të qymyrit, ndonëse në mënyrë graduale dhe të diferencuar, por realiteti thotë se situata ende nuk po ecën në rrugën e duhur.

Sipas të dhënave nga Global Energy Monitor, një grup kërkimor jofitimprurës, rezulton se në nivel global numri i impianteve me qymyr po rritet: numri i atyre në ndërtim është më i madh se i atyre të çaktivizuara ose të çmontuara.

Numri më i madh i termocentraleve me qymyr në ndërtim janë në Azi, me Kinën që prodhon 52% të 176 gigavateve të planifikuara për të ardhmen nga rreth njëzet vende aziatike. Projeksioni ka rënë paksa në krahasim me atë që supozohej në vitin 2020, kur flitej për termocentrale për 181 gigavat, por, shpjegon Lauri Myllyvirta (Qendra për Kërkime për Energjinë dhe Ajrin e Pastër), “jemi dëshmitarë të një situate paradoksale: pothuajse kudo përtej Kinës, planet për të ndërtuar termocentrale të reja me qymyr janë shkurtuar në mënyrë drastike, ndërkohë që kompanitë kineze kanë vazhduar të shpallin termocentrale të reja dhe ka mbështetje të qartë nga qeveria.”

Sipas analistëve, Kina nuk pritet të ndryshojë kursin për qymyrin në të ardhmen e afërt, megjithëse financimi për projektet për ndërtimin e termocentraleve me qymyr në vende të tjera për një total prej 13 gigavat dhe termocentralet për 37 gigavat të tjera janë bllokuar dhe nuk do mund të gjejnë mbështetje.

Gjithsesi, ka edhe një fakt tjetër që shqetëson: një sasi rekord qymyri është djegur vitin e kaluar, ndoshta për shkak të rritjes së çmimit të gazit. Megjithatë, megjithëse gazi është gjithashtu një lëndë djegëse fosile, është ende e dëshirueshme që ai të kthehet në më të lirë se qymyri, i cili mbetet karburanti më i keq për sa i përket emetimeve të dioksidit të karbonit. FCS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.